Gúlshara Ábdiqalyqova Eýropa qaıta qurý jáne damý bankiniń ókilderimen kezdesti
Qyzylorda oblysynyń ákimi Gúlshara Ábdiqalyqova Eýropa qaıta qurý jáne damý bankiniń (EBRR) Qazaqstan boıynsha dırektory Hýseın Ozhanmen kezdesti.
Basqosýda eki taraptyń iskerlik baılanysyn odan ári damytý máselesi sóz boldy.
Aımaq basshysy aldymen Hýseın Ozhandy jańa laýazymǵa taǵaıyndalýymen quttyqtady.
Sondaı-aq, Qyzylorda oblysynyń Eýropa qaıta qurý jáne damý bankimen birlesken jobalardy júzege asyrýda bastamashyl óńirlerdiń qatarynda ekenin atap ótti.
«Búgingi tańda atalǵan bankpen birlesken 4 joba júzege asyryldy. Olar - jylý, sý, elektrmen qamtý jáne avtobýs parkin qurý jobalary. Oblys ortalyǵyn jylýmen qamtamasyz etý boıynsha 6,3 shaqyrym jylý jelisi júrgizildi. Sý júıesin jańartý boıynsha qalada arnaıy tehnıka men jyljymaly zerthana satyp alyndy. Elektrmen qamtamasyz etý boıynsha Qyzylorda qalasy jáne Shıeli aýdanynda elektr jelileri men transformatorlyq qosalqy stantsııa jańartyldy. Elektr qýatyn tirkeýdiń avtomattandyrylǵan júıesine qosyldy. Bul 3 joba boıynsha jaýapty kommýnaldyq mekemeler Bank aldyndaǵy mindettemesin ýaqytyly oryndap otyr. Al, Qyzylorda qalasynda avtobýs parkin qurý jobasy boıynsha birlese atqaratyn jumystar bar. Joba aıasynda 112 avtobýs satyp alyndy, onyń ishinde, 92 kólik Eýropa qaıta qurý jáne damý banki arqyly alyndy», - dedi oblys ákimi.
Kezdesýde óńir basshysy bank tarapynan berilgen nesıe kólemin qaıta qarap, ýaqytyn sozýdy usyndy.
Budan bólek eki taraptyń kelisýimen Qyzylorda-Jezqazǵan tas jolyn qaıta jóndeý jumysy qolǵa alynady.
Aldaǵy ýaqytta 208 shaqyrymdy quraıtyn jol paıdalanýǵa berilse, jolaýshylar men júk tasymaly kólemin strategııalyq baǵyt boıynsha ulǵaıtýǵa septigin tıgizedi.
Hýseın Ozhan óz kezeginde atalǵan jumystardyń ýaqytyly oryndalýyna múddeli ekenin jáne eki jaqty seriktestiktiń odan ári damıtynyna senim bildirdi.
Eske sala keteıik, Qyzylordada 2025 jylǵa deıin jergilikti kanaldardy tsıfrlandyrýǵa mán beriletini aıtylǵan bolatyn.