Gúlshara Ábdiqalyqova elordadaǵy kópbalaly analarmen kezdesti

NUR-SULTAN. QazAqparat - Búgin elorda ákimdiginde QR Premer-Mınıstriniń orynbasary Gúlshara Ábdiqalyqova Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý boıynsha kópbalaly analarmen kezdesti, dep habarlaıdy QazAqparat tilshisi.

Sonymen qatar, sharaǵa Nur-Sultan qalasynyń ákimi Baqyt Sultanov, Eńbek jáne halyqty áleýmettik qorǵaý mınıstri Berdibek Saparbaev, Bilim jáne ǵylym mınıstri Kúlásh Shámshıdınova, Densaýlyq saqtaý mınıstri Eljan Birtanov qatysty.

«Úkimet múshelerinen quralǵan úlken top barlyq óńirlerde bolyp, turǵyndarmen kezdesýler ótti. Osy oraıda kópbalaly analarmen, jumys berýshilermen júzdesip, áleýmettik jaýapkershilik jáne kópbalaly otbasylarǵa kómektesý máseleleri qaraldy. Jalpy alǵanda, óńirlerdegi 156 eldi mekende 30 myńǵa jýyq adammen kezdestik. 262 úlken kezdesý boldy, sondaı-aq 276 azamatty biz jeke qabyldadyq jáne 72 az qamtylǵan otbasyǵa bardyq», - dedi Úkimet basshysynyń orynbasary.

Osy oraıda G. Ábdiqalyqova atalǵan kezdesýlerden keıin áleýmettik qamqorlyq baǵdarlamasy aıasyndaǵy tólemderge baılanysty keıbir problemalar da anyqtalǵanyn atap ótti. Bul turǵyda tıisti sheshimder iske asyryldy.

Aıta keteıik, Elbasy Nursultan Nazarbaevtyń tapsyrmasy boıynsha elimizde jańa áleýmettik saıasat júzege asyrylýda. Negizgi mindet - ómir súrý sapasyn jaqsartý jáne azamattardyń ál-aýqatyn arttyrý.

Búgingi kúni elordada 10,1 myń kópbalaly analar bar (4,4 myń kóp balaly ana «Altyn alqa» jáne «Kúmis alqamen» marapattalǵan) onyń 3,5 myńnan astamy az qamtylǵan.

Taratylǵan málimetterge qaraǵanda, elorda ákimdiginde kópbalaly analarǵa áleýmettik kómek kórsetýdiń 13 keshendi sharasy ázirlenip, iske qosyldy. Osylaısha, aǵymdaǵy bıýdjetten áleýmettik kómek kórsetý úshin 5,6 mlrd teńge bólinip, aldaǵy bıýdjetti naqtylaý kezinde 2,4 mlrd teńge kóleminde qosymsha qarjy qarastyrylatyn bolady.

Áleýmettik sharalar aýqymynda kópbalaly otbasylarǵa jáne turǵyn úımen qamtamasyz etilmegen múgedek balalary bar otbasylarǵa sertıfıkat berý múmkindigi qarastyrylýda. Búgingi kúni bıýdjettik uıymdar qyzmetkerlerine arnalǵan turǵyn úı sertıfıkattary tólenip, Naýryz merekesine oraı quny 1 mln teńge bolatyn 2000 sertıfıkattyń 143-i berildi.

Kezdesý barysynda kópbalaly jáne az qamtylǵan otbasylarǵa memlekettik áleýmettik kómek týraly kópbalaly analardyń ókilderi óz pikirlerimen bólisti.

Óz kezeginde QR Premer-Mınıstriniń orynbasary memlekettik organdardyń basshylaryna birqatar tapsyrmalar berdi.