Gúlshara Ábdiqalyqova Dúnıejúzilik hırýrgter qaýymdastyǵynyń kongresine qatysty
Kongreske Densaýlyq saqtaý mınıstri Eljan Birtanov, kórnekti álemdik deńgeıdegi jáne qazaqstandyq kardıohırýrgter men ǵalymdar, densaýlyq saqtaý salasynyń uıymdastyrýshylary, otandyq jáne sheteldik sarapshylar, medıtsına qyzmetkerleri qatysty.
Memlekettik hatshy kongrestiń ashylý rásiminde Qazaqstan Prezıdentiniń forýmǵa qatysýshylarǵa arnaǵan quttyqtaýyn oqyp berdi. Onda halyq densaýlyǵy men densaýlyq saqtaý salasyn damytý memleketimizdiń basym baǵyttarynyń biri ekeni atap ótilgen. Qazaqstan - búkil halyq joǵary mamandandyrylǵan tegin medıtsınalyq kómekke qol jetkize alatyn álemdegi az ǵana memlekettiń biri. Ulttyq ǵylymı kardıohırýrgııa ortalyǵynda kardıohırýrgııalyq operatsııanyń barlyq túri jasalady. Ol elimizdiń ǵana emes, álemdik kardıohırýrgııanyń kóshbasshysynyń birine aınaldy. Adamzattyń densaýlyǵyn jaqsartý jolynda óz bilimi men kásibıligin iske asyrýǵa daıyn jetekshi mamandardyń basyn qosqan jahandyq forým - sonyń aıqyn dáleli.
Búginde «Densaýlyq» baǵdarlamasynyń arqasynda Qazaqstannyń kardıohırýrgııalyq qyzmeti qarqyndy damyp keledi. Eger 90-shy jyldardyń basynda elde júrekke jasalatyn ashyq operatsııa sany jylyna 500-den artpasa, 2016 jyly 12 myńnan asyp tústi. Qazaqstan kardıohırýrgııanyń damý deńgeıi jóninen ozyq 30 eldiń tizimine kiredi.
2010 jyly qurylǵan Ulttyq ǵylymı kardıohırýrgııa ortalyǵy otandyq kardıohırýrgııanyń kóshbasshysy bolyp sanalady. Búginge júrek-qan tamyrlary aýrýlaryn dıagnostıkalaýǵa jáne emdeýge arnalǵan 18 ınnovatsııalyq tehnologııa engizildi, álemniń tek 20 elinde ǵana júrgiziletin 2050 biregeı ota jasaldy. Ortalyq júrek almastyrýǵa arnalǵan 55 operatsııany tabysty iske asyrdy.
Aıta keterligi, Dúnıejúzilik kardıovaskýlıarlyq jáne torakaldyq hırýrgter qaýymdastyǵy 1990 jyly Kantsler Djýro Vadanyń (Japonııa) basshylyǵymen quryldy. Alǵashqy keńesi 1991 jyly Chıangmaıda (Taıland) ótti.