Gúlshara Ábdiqalyqova dıplomatııalyq mıssııasyn aıaqtaǵan Slovakııa Elshisimen kezdesti
«Qazaqstandaǵy Elshi laýazymynda ótkizgen qyzmetińiz barysyndaǵy birlesken jumystaryńyzǵa rızashylyq bildiremin. Sonymen qatar Qazaqstandaǵy Slovakııa Elshisi mıssııańyzdyń tabysty aıaqtalýymen quttyqtap, aldaǵy qyzmetińizge, otbasyńyzǵa zor tabystar tileımin. Osy jyldardyń ishinde Qazaqstan men Slovakııanyń ózara yntymaqtastyǵyn belsendi ilgerilete aldyq dep oılaımyn. 2006 jyly Slovakııa Elshiligi ashyldy. Soǵan saı Bratıslavadaǵy ókildigimiz de belsendi jumys istedi», - dep atap ótti kezdesý barysynda Memlekettik hatshy.
G.Ábdiqalyqova Slovakııa basshylyǵyna «EKSPO-2017» kórmesine qatysqany úshin rızashylyq bildirip, bul eldiń balamaly energetıka salasyndaǵy jetistikteriniń mańyzyn atap ótti.
Kezdesý barysynda Qazaqstan-Slovakııa qarym-qatynasynyń qazirgi ahýaly, sonymen qatar saıası, ekonomıkalyq jáne mádenı-gýmanıtarlyq yntymaqtastyq keleshegi talqylandy. Bıyl Qazaqstan men Slovakııa dıplomatııalyq qarym-qatnyastarynyń 25 jyldyǵyn atap ótýde. Osyǵan oraı eki memleket arasyndaǵy ornyqty ári sapaly deńgeıdegi saıası baılanystarǵa oń baǵa berildi.
Slovakııa Elshisi kezdesý aıasynda BAQ ókilderine suhbat berip, eki eldiń saıası saladaǵy yntymaqtastyǵynyń joǵary deńgeıde ekendigin basa aıtty.
«Sońǵy ret Slovakııa Respýblıkasynyń Syrtqy ister mınıstri EO tóraǵasy retinde elderińizge kelip, sol kezde Eýropalyq odaq pen Qazaqstan arasyndaǵy yntymaqtastyqty kúsheıtý týraly shartqa qol qoıyldy. Biz saýda-ekonomıkalyq yntymaqtastyqpen baılanysty máselelerdi sheship, EKSPO kórmesine belsendi qatystyq. Slovaktsııanyń pavılony ádemiligi jaǵynan ekinshi orynda turdy. Ony 316 myń adam tamashalady. Slovakııadan da myńnan astam adam EKSPO-2017 kórmesin aralady», - dedi Peter ıÝza.