Gúlshara Ábdiqalyqova bes balasyn jalǵyz ósirip jatqan ákege páterdiń aqshalaı sertıfıkatyn tabystady

ÓSKEMEN. QazAqparat - Shyǵys Qazaqstanda jumys saparymen júrgen QR Premer-Mınıstriniń orynbasary Gúlshara Ábdiqalyqova bes balasyn jalǵyz tárbıelep otyrǵan óskemendiktiń úıinde boldy, dep habarlaıdy QazAqparat tilshisi.

Nurlan Jetpisovtiń bes balasy bar. Jubaıy ómirden erte ozyp, bes balaǵa ana da, áke de bolyp otyr.

N.Jetpisovtiń aıtýynsha, buǵan deıin páter jaldap, kóringenniń esigin saǵalap júrgen eken. Osyndaı otbasynyń bar ekenin bilgen «VK Tehnogrýpp» JShS Jibek Joly kóshesinen ózderi salǵan kópqabatty úıdiń birinshi qabatynan eki bólmeli páter syılaǵan.

«Qyzdarymnyń úlkeni 10 synypta, al eń kishisi birinshi synypqa barady. Basymyzǵa pana tabylyp, qatty qýanyp jatyrmyz. Eń bastysy osy baspana bolatyn. Qalǵanyn óz kúshimizben kóremiz» - deıdi Nurlannyń ózi.

Gúlshara Ábdiqalyqova qonys toıyn toılap jatqan otbasyǵa kórimdik retinde aqshalaı sertıfıkat tabystady.