Gúlshara Ábdiqalyqova bastaǵan úkimettik delegatsııa Almatyǵa keldi
Jumys tobynyń quramynda - QR Eńbek jáne halyqty áleýmettik qorǵaý mınıstri B. Saparbaev, Bilim jáne ǵylym mınıstri K. Shámshıdınova, Densaýlyq saqtaý mınıstri E. Birtanov, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M. Jaıymbetov bar.
Delegatsııa aldymen №2 qalalyq balalar klınıkalyq aýrýhanasynyń janyndaǵy konsýltatsııalyq-dıagnostıkalyq pedıatrııa ortalyǵyna bardy. Onda delegatsııaǵa qabyldaý bólimi men hırýrgııa kesheniniń jumysy tanystyryldy. Ony bıznestiń áleýmettik jaýapkershiligi aıasynda Ásel Tasmaǵambetova basshylyq etetin «Sábı» qaıyrymdylyq qory qurǵan. Jobanyń jalpy quny - 2,5 mlrd teńge.
Qazaq onkologııa jáne radıologııa ǵylymı-zertteý ınstıtýtynda G. Ábdiqalyqova molekýlalyq-genetıkalyq zertteýler ortalyǵynyń jumysymen tanysty. Medıtsınalyq mekeme zamanaýı jabdyqpen: kompıýterlik jáne magnıtti-rezonanstyq tomograftarmen, saraptamalyq klastaǵy radıografıkalyq rentgen jáne ýltradybystyq júıelermen, EKG-apparattarmen jabdyqtalǵan. Barlyq úderister tsıfrlyq formatta júzege asyrylady.
Sodan keıin QR Premer-Mınıstrdiń orynbasary «Meyirim» múmkindigi shekteýli balalar men jasóspirimderge arnalǵan ońaltý ortalyǵyna bardy. Ortalyqta 3-15 jas aralyǵyndaǵy múmkindigi shekteýli balalar men jasóspirimderdiń jan-jaqty damýy, áleýmettenýi men oqýy úshin barlyq qajetti jaǵdaı jasalǵan. Ortalyq ashylǵan kezden bastap (2018 jyldyń qarashasy) 200-ge jýyq bala ońaltý men áleýmettendirý sharacynan ótti.
Kelesi is-shara 2018 jyldyń maýsym aıynan beri jumys istep kele jatqan Belsendi uzaq ómir súrý ortalyǵynda ótti. Onda medıtsınalyq kabınet, ıoga zaly, kompıýterlik saýattylyqty oqytý, qazaq jáne aǵylshyn tilderin úıretý kabınetteri, sondaı-aq eńbek terapııasyna arnalǵan kabınet bar. Osy ýaqyt aralyǵynda 900-ge jýyq zeınetker basseınder men fıtneske tegin baryp, 300-den astam qart adam «Suńqar» tálimbaǵyna, taýdaǵy «Medeý» sport keshenine, Ortalyq memlekettik mýzeıge jáne t.b. tegin ekskýrsııa jasady.
Sondaı-aq, Premer-Mınıstrdiń orynbasary men Eńbek jáne halyqty áleýmettik qorǵaý mınıstri Halyqty jumyspen qamtý ortalyǵynyń qyzmetine tekserý júrgizdi. Jyl basynan beri 3,4 myń adam jumysqa ornalastyryldy, onyń 254-i az qamtylǵan, kóp balaly otbasylardan shyqqandar. 717 adam áleýmettik jumys oryndarymen qamtamasyz etildi. 2,5 myń adam qoǵamdyq jumystarǵa tartyldy.
Sonymen birge, G. Ábdiqalyqova azamattardy qabyldady. Atap aıtqanda, 4 balany tárbıelep otyrǵan kópbalaly ana Janna Toqtasynova jubaıyn jumysqa ornalastyrý jóninde ótinish bildirip kelgen bolatyn. Ataýly áleýmettik kómekti alý úshin jubaıy jumyspen qamtylýy tıis. Másele sheshildi - vıtse-premer qala basshylyǵyna naqty tapsyrma berdi.
Birinshi jumys kúni aıaqtalǵanda Premer-Mınıstrdiń orynbasary «SmArt Point» kovorkıng ortalyǵynyń alańynda jastarmen kezdesti. Kezdesýde eńbek jáne halyqty áleýmettik qorǵaý, aqparat jáne qoǵamdyq damý, bilim jáne ǵylym, densaýlyq saqtaý mınıstrleri, Almaty qalasynyń ákimi, qurylys jáne turǵyn úı-kommýnaldyq sharýashylyq isteri, sport jáne dene shynyqtyrý komıtetteriniń tóraǵalary sóz sóıledi.
Іs-sharany asha otyryp, Gúlshara Ábdiqalyqova Qazaqstan sabaqtastyq, ádildik jáne progress prıntsıpterine súıene otyryp, qaryshtap damýyn jalǵastyryp kele jatqanyn atap ótti. Osy úderisterde jastar sheshýshi róldiń birin atqarýy tıis.
Búginde Almatyda jastardyń sany 684 myńnan asady, olardyń 218 myńnan astamy joǵary oqý oryndarynyń stýdenti. «Jastardy damytý men qoldaýdyń 2017-2020 jyldarǵa arnalǵan Jol kartasy» iske asyrylýda. 20 myńnan astam adam jumysqa ornalastyryldy. «Almaty Jastary» jeńildikti turǵyn úı baǵdarlamasy boıynsha jas otbasylar úshin 238 turǵyn úı zaımy berildi. Bilim berý grantynyń sany 1,5 ese kóbeıip, 28 myńǵa jetti.
Kezdesýde «Inno Track» JShS-nyń bas dırektory Darhan Qyzaıbaevtyń sózine erekshe nazar aýdaryldy. Onyń kásiporny «Vollert» nemis tehnologııasy boıynsha temir-betondy shpaldar shyǵarady. Zaýyttyń jyldyq qýattylyǵy - 500 myń shpal, 100 adam jumys isteıdi. Ol talapty jastar úshin «múmkindikter esigin» ashatyn zamanaýı ındýstrıaldy saıasat úshin memleketke alǵysyn bildirdi.
Sondaı-aq «Youth Art» jas sýretshiler uıymynyń basshysy Krıstına Bekmyrzaevanyń sózin jurt qyzyǵa tyńdady. Olar «Gorod dlıa lıýdeı» tujyrymdamasyn iske asyrýǵa belsene qatysyp, 10 joǵary deńgeıdegi shaǵyn sáýlet pishinin ornatty.
Kezdesý qorytyndysy boıynsha Premer-Mınıstrdiń orynbasary G. Ábdiqalyqova memlekettik organdardyń basshylaryna birqatar naqty tapsyrma berdi.
Delegatsııanyń Almaty qalasyndaǵy jumys sapary jalǵasyn tabýda.