Gúlshara Ábdiqalyqova bastaǵan Úkimet toby aqtóbelik stýdenttermen kezdesti
Aqtóbe oblysyna kelgen Úkimettiń jumys toby aldymen Q.Jubanov atyndaǵy Aqtóbe óńirlik ýnıversıtetiniń jastarymen kezdesý ótkizdi. Jastar saraıy kúrdeli jóndeýden ótip, munda kıno zaly, májilis zaly men sán stýdııasy ashylǵan. Úkimet tobyna jastar birneshe suraǵy men usynysyn aıtty.
«Jastar úshin jumyssyzdyq máselesi birinshi orynda turady. Jumyssyzdyqtyń aldyn alý úshin óńirdegi 160-tan astam kásiporyn óz qarjysyna stýdentterdi oqytyp jatyr. Stýdentter maman atanǵan soń birden jumysqa ornalasady. Munda eki másele birden sheshimin tabady. Bul óndiristegi kadr jetispeýshiligi men jastar arasyndaǵy jumyssyzdyq. Bul joba Qazaqstannyń ózge JOO-larynda iske asyrylsa úlken problema sheshiletin edi», - dedi fılologııa fakýltetiniń stýdenti Aslan Ábýov. Sonymen qatar, kezdesý kezinde Qaraqalpaqstannan kelip, tegin bilim alyp jatqan stýdentterdiń jaıy aıtyldy. Qazirgi ýaqytta Aqtóbe ýnıversıtetinde 850 stýdent bar. Bári de ýnıversıtet esebinen bilim alyp júr. Olar Bilim jáne ǵylym mınıstrliginen arnaıy grant bólýdi surady.
«Jyl saıyn bólinetin memlekettik granttyń 2 paıyzy qazaq dıasporasynyń balalaryna beriletin edi. Qazir 4 paıyzǵa kóterildi»,- dedi QR Bilim jáne ǵylym mınıstri Kúlásh Shámshıdınova.
Aıta keteıik, kezdesý kezinde QR Premer-mınıstriniń orynbasary Gúlshara Ábdiqalyqova jastarǵa úlken senim artylǵanyn jetkizdi.
«Batys ólkede bolyp jatqan dástúrge baılanysty Kórisý kúnimen shyn júrekten quttyqtaımyn. Bıyl Jastar jyly dep te jarııalandy. Mundaǵy maqsat meıram ótkizý emes, jastardyń talabyna jol ashyp, olardyń qoldan keler múmkindigin kórsetýge septigin tıgizý. Respýblıka boıynsha jastar máselesine baılanysty 26 mıllıard teńge qarastyrylyp otyr. Bilim basty orynda bolady. JOO-larǵa Nazarbaev Ýnıversıtettiniń standarttary engiziledi. Jumyspen qamtý máselesinde «Atameken» UKK-men birge jumys atqarylady. Ýnıversıtettiń daıyndaǵan kadry jumysqa ornalassa, bul da basty kórsetkish bolady. Sonymen qatar, jastar jastarǵa kómek kórsetýi kerek», - dedi Gúlshara Ábdiqalyqova.
Úkimettiń QR Premer-Mınıstriniń orynbasary Gúlshara Ábdiqalyqova bastaǵan áleýmettik blogynyń birinshi basshylarynan quralǵan jumys toby Elbasynyń «Áleýmettik qamqorlyq» jańa áleýmettik sharalaryn iske asyrý boıynsha aqparattyq-túsindirý jumystaryn júrgizý úshin óńirlerge saparyn bastaǵan bolatyn.