Gúlshara Ábdiqalyqova bastaǵan Úkimet músheleri aqmolalyqtarmen kezdesti
Sapar aıasynda Elbasy Nursultan Nazarbaevtyń «Nur Otan» partııasynyń HVІІІ sezinde áleýmettik qoldaýdy kúsheıtý, halyqtyń ómir súrý sapasyn jaqsartý baǵytynda alǵa qoıǵan mindetterin júzege asyrý tetikteri tanystyryldy.
«Elimiz batysyndaǵy birqatar oblystardy aralap, áleýmettik qamqorlyq sharalary jaıynda el ishinde túsindirý jumystaryn júrgizdik. Ol óńirlerdegi kókeıkesti máselelerdi saralaýdamyz. Ortaq túıinge kelgen soń jalpy elge qatysty máselelerdi jınaqtap, ortaq sheshimin tabatyn jol izdeıtin bolamyz. Búgingi kúni elimizde jańa serpindi damý kezeńi bastaldy», - dedi Kókshetaýdaǵy «Dostar» mádenıet saraıynda ótken kezdesýde QR Premer-Mınıstriniń orynbasary Gúlshara Ábdiqalyqova.
Sonymen qatar, Úkimet basshysynyń orynbasary elimizdiń barlyq óńirinde áleýmettik másele bar ekenin, onyń ishinde baspana máselesi ózekti bolyp otyrǵanyn atap ótti.
«Barlyq jerde de eń basty másele turǵyn úıge tirelip otyrǵandyǵyn kórip otyrmyz. Bul oraıda aıtatynymyz, 2025 jylǵa deıin jalpy elimiz boıynsha 40 myń páter paıdalanýǵa beriletin bolady. Al, az qamtylǵan otbasylarǵa jaldamaly páterler mamyr aıynan bastap beriledi. Negizinde bul shara tabysy óte az azamattardyń turǵyn úı máselelerin sheshýdi, bilim jáne densaýlyq saqtaý salalarynyń qyzmetin jaqsartýdy qamtıdy. Elimizde osy bir aýqymdy máseleni tek qana bıliktiń moınyna artyp qoımaı, el bolyp sheship jatqan jaqsy mysaldar bar», - dedi Gúlshara Ábdiqalyqova.
Osy oraıda, ol Qyzylorda oblysynyń kásipkerleri óz qarajattaryna kópbalaly analarǵa turǵyn úı alyp berip jatqany ózge óńirlerdegi qaltaly azamattarǵa úlgi bolatynyn atap ótti.
«Halqymyz qashanda qınalǵanǵa qamqor, júdegende janashyr bola bilgen ǵoı. Negizgi jumys úsh baǵytta órbıdi. Atap aıtqanda, eń az qamtylǵan otbasylarǵa ataýly kómek kórsetý, bıýdjettik mekeme qyzmetkerleriniń jalaqysyn ósirý, sondaı-aq medıtsına jáne bilim salasyna qatysty máseleler. Bul oraıda, medıtsınanyń alǵashqy qoljetimdiligi, dári-dármektiń sapasy jáne baǵasy. Aýyldyq jerlerdiń eńsesin kóterý de kezek kúttirmeıtin másele. Bul oraıda mynadaı jaqsy jańalyqty ekpin túsire aıta ketken oryndy bolmaq. Máselen, kópbalaly aýyl turǵyndaryna jańa bıznes-ıdeıalardy iske asyrý úshin memlekettik granttar bólinbekshi. Sonymen qatar, aýyldyq jerlerdegi kópbalaly analar men asyraýynda múgedekteri bar adamdar qataryndaǵy kásipkerlerge mıkrokredıtter beriledi. Kólemi 500 myń teńgeden 20 mıllıon teńgege deıin», - deıdi Gúlshara Ábdiqalyqova.
Budan bólek, QR Eńbek jáne halyqty áleýmettik qorǵaý mınıstri B.Saparbaev, Densaýlyq saqtaý mınıstri E.Birtanov, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M.Jaıymbetov kezdesý barysynda Elbasy tapsyrmasyn júzege asyrýǵa baılanysty kóptegen jaılarǵa keńinen toqtaldy.