Gúlshara Ábdiqalyqova BAÁ, Mysyr jáne Grýzııanyń isker áıelderimen kezdesti

ASTANA. QazAqparat - Astanada QR Memlekettik hatshysy Gúlshara Ábdiqalyqova Astananyń 20 jyldyq mereıtoıyn merekeleýge arnalǵan is-sharalar aıasynda Birikken Arab Ámirlikteriniń, Mysyrdyń jáne Grýzııanyń isker áıelderimen kezdesti, dep habarlaıdy QazAqparat.

Kezdesýge BAÁ-niń QR-daǵy Tótenshe jáne ókiletti elshisi M.Ál-Djaber, BAÁ Prezıdenti janyndaǵy Kásipker áıelder keńesiniń prezıdenti F.Kamber Ál-Avadhı, Grýzııanyń Іsker áıelder keńesiniń prezıdenti E.Maısýradze, sondaı-aq Qazaqstan, BAÁ, Mysyr bıznes qaýymdastyqtary ókilderi qatysty.

Gúlshara Ábdiqalyqova óz quttyqtaý sózinde el Prezıdenti N.Nazarbaevtyń: «Qazaqstannyń áıelderi elimizdiń Táýelsizdigin qalyptastyrý jáne nyǵaıtý isine eseli úles qosyp keledi» degen sózine nazar aýdardy.

Memlekettik hatshy elimizde áıelder kásipkerligin damytý, ana men balany qorǵaý, áıelder quqyǵy men múmkindikterin keńeıtý baǵytynda Elbasynyń basshysynyń qoldaýy arqasynda aýqymdy jumystar júrgizilip jatqandyǵyn atap ótti.

Odan soń G.Ábdiqalyqova bıznes-ortany ulǵaıtý jáne túbegeıli jaqsartý memlekettik saıasattyń negizgi basymdyǵynyń biri ekenin aıtty. Elimizde JІÓ-ge shaǵyn jáne orta bıznestiń qosatyn úlesin 2050 jylǵa qaraı 50%-dan kem emes mólsherge jetkizý jóninde strategııalyq maqsat qoıylǵan.

«Qazaqstan qazirgi ýaqytta shıkizatqa táýeldilikten arylý jáne aqyldy ınnovatsııalyq ekonomıka qurý saıasatyn júrgizýde. Osy baǵytta áıelder kásipkerligi de qarqyndy damyp keledi. Qazaqstandyq qyz-kelinshekter úshin bızneste densaýlyq saqtaý, bilim berý, mádenıet, aqparat, feshn-ındýstrııa jáne t.b. salalardaǵy qyzmet kórsetý isi basymdyqqa ıe. Qarjy ınstıtýttarymen yntymaqtastyq belsendi túrde damytylýda», - dedi G.Ábdiqalyqova.

Kezdesý sońynda QR Memlekettik hatshysy G.Ábdiqalyqova Qazaqstan, BAÁ, Mysyr jáne Grýzııanyń isker áıelderine zor densaýlyq, mol tabys jáne baq-bereke tiledi.