Gúlshara Ábdiqalyqova aýǵan soǵysy ardagerlerimen kezdesti

QYZYLORDA. QazAqparat - Qyzylorda oblysynyń ákimi Gúlshara Ábdiqalyqova aýǵan soǵysy ardagerlerimen kezdesti. Olardyń qatarynda Qazaqstan Respýblıkasy Parlamenti Májilisiniń depýtaty, «Qazaqstan Ardagerleri» qaýymdastyǵynyń tóraǵasy Baqytbek Smaǵul boldy, dep habarlaıdy QazAqparat tilshisi.

Jıynǵa «Aýǵanstan jáne jergilikti soǵystar ardagerleri» odaǵynyń tóraǵasy Sháripbaı Ótegenov, oblystyq «Aýǵan soǵysynyń ardagerleri odaǵy» qoǵamdyq birlestiginiń tóraǵasy Qaıraddın Baımahanov, oblystyq «Aýǵan soǵysynyń ardagerleri men múgedekteriniń keńesi» qoǵamdyq birlestiginiń tóraǵasy Jaras Ospanov qatysyp, birqatar mańyzdy máselelerdi talqylady.

«Bıyl - Táýelsizdigimizdiń 30 jyldyǵy, sondaı-aq, Keńes áskerleriniń Aýǵanstan aýmaǵynan shyǵarylǵanyna 32 jyl tolyp otyr. Aýǵan soǵysyna qatysyp, búgingi beıbit kúni elge bolsyn dep qyzmet jasap júrgen ardagerlerimiz qashanda qurmetke laıyq. Olardyń ǵıbratty ǵumyryn kópke úlgi, óskeleń jas urpaqqa ónege etý - bizdiń basty maqsatymyz», - dedi Gúlshara Ábdiqalyqova.

Kezdesýde Baqytbek Smaǵul kórsetilgen qurmetke rızashylyǵyn bildirip, aýǵan soǵysy ardagerleri jastarǵa otanshyldyq rýhpen erliktiń úlgisin kórsetýge múddeli ekenin jáne birlese jumys atqarýǵa daıyn ekenin aıtty.

Al, Sháripbaı Ótegenov aýdan soǵysy ardagerlerine qaralǵan áleýmettik kómekti ulǵaıtý boıynsha usynysyn jetkizdi.

Oblys ákimi kóterilgen máseleler aldaǵy ýaqytta kezeń-kezeńimen qaralatynyn aıtyp, «Qazaqstan ardagerleri» qaýymdastyǵynyń bastamasymen uıymdastyrylǵan «Respýblıkalyq aýǵan soǵysy ardagerleri uıymdarynyń ortalyq keńesiniń QR Táýelsizdiginiń 30 jyldyǵyna» arnalǵan konferentsııa jumysyna sáttilik tiledi.

Eske salaıyq, aýǵan soǵysyna elimizden 22 myń sarbaz qatyssa, onyń 942-i týǵan jerge oralmady.

Syr óńirinen 827 adam attanyp, onyń 18-i Aýǵanstan jerinde ajal qushty.