Gúlmıra Satybaldy Tursyn Alagózovke 6,5 mlrd teńgeniń aktsııalaryn qaıtarady

ASTANA. QazAqparat – Gúlmıra Satybaldy memlekettik kiriske jáne baj retinde 65,8 mln teńge óteýi tıis. Sot úkimi kúshine endi, dep habarlaıdy QazAqparat tilshisi.

«Gúlmıra Satybaldydan T. Alagózovke keltirgen materıaldyq jáne moraldyq zalaldy óndirip alý týraly azamattyq talap ishinara qanaǵattandyrylsyn. G. Satybaldydan materıaldyq zalal keltirgeni úshin jábirlenýshi T. Alagózovtiń paıdasyna 6,5 mlrd teńge kóleminde «Galanz bottlers» AQ jaı aktsııalarynyń 43%-y óndirip alynsyn. Sonymen qatar, G. Satybaldydan moraldyq zalal keltiregeni úshin 1 mln teńge óndirilsin. Odan bólek, memlekettiń kirisine jáne memlekettik baj retinde 65,8 mln teńge óndirilisin», - dedi sýdıa Kemeńger Imashev.

Sondaı-aq, sot Gúlmıra Satybaldynyń jazasyn qaýipsizdigi ortasha deńgeıdegi mekemede óteıtini týraly qaýly shyǵardy.

«Úkim shyǵarylǵan sátten bastap zańdy kúshine enedi. G. Satybaldy jazasynyń merzimi qamaýǵa alynǵan sátten bastap, ıaǵnı 2022 jylǵy 16 naýryzdan beri 1,5 táýlikke bir kún qamaýda ustaý esebinen zańdy kúshine engenge deıin eseptelsin», - deıdi sýdıa.

Búgin astanadaǵy №2 Baıqońyr aýdandyq sotynda Gúlmıra Satybaldyǵa 7 jylǵa bas bostandyǵynan aıyrý jazasy taǵaıyndaldy.

Eske salaıyq, Gúlmıra Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergeýge alynǵan edi. Jábirlenýshige kelgen zalal somasy – 6,6 mlrd teńgeden asady.

Sondaı-aq, Gúlmıra Satybaldynyń sotqa deıingi tergeý kezinde shekara asyp ketpek bolǵany belgili boldy.

Ol sotta aıybyn ishinara ǵana moıyndady.

Aıta ketsek, prokýror Gúlmıra Satybaldyny 8 jylǵa bas bostandyǵynan aıyrýdy suraǵan edi.

Sonymen qatar, Gúlmıra Satybaldy aıyptaýlarmen kelispeıtinin aıtyp, ádil sheshim qabyldaýǵa ótinish jasaǵan bolatyn.