Gúlmıra Satybaldy sotta aıybyn ishinara ǵana moıyndady

ASTANA. QazAqparat – Astanada Gúlmıra Satybaldy isi boıynsha sot otyrysy jalǵasýda. Búgin aıyptalýshy kýálik etti jáne óz kinásin ishinara moıyndady, dep habarlaıdy QazAqparat tilshisi.

Gúlmıra Satybaldy jábirlenýshi Aıgúl Mekeshevamen alǵash tanysqan sátten bastap jaqyn bolǵandaryn jáne oǵan esh shaǵymy joq ekenin aıtty.

Ol eshqashan urlaý týraly tapsyrma bermegenin, mundaı áreketke barmaıtynyn jáne eshqashan zań normalaryn buzbaǵanyn aıtty.

Sondaı-aq, G. Satybaldy óziniń kómekshisi Áıgerim Syzdyqovaǵa senim artqanyna ókinetinin, dál osy Á. Syzdyqova A. Mekeshevanyń óz mindettemesin oryndamaǵanyn aıtqanyn jetkizdi.

A. Mekeshevaǵa renishpen G. Satybaldy «Galanz bottlers» AQ 5%-yn berý týraly ýádesin oryndaǵysy kelmegen.

Ol A. Mekeshevamen túrli jobalarda birge jumys istegendikten, taǵy kólikke, páterge, keńsege aqsha taba alady dep oılaǵan.

«Ozbyrlyq aıyby boıynsha aktsııanyń 5%-yn ýáde etip, ony bermegenimdi moıyndaımyn», - dedi Gúlmıra Satybaldy sottaǵy sózinde.

Bul rette aıyptalýshy «Aıgúl Mekeshevany urlap áketti,»Maxi Bottlers«seriktestigin G. Satybaldynyń senimdi tulǵalaryna qaıta jazýǵa májbúrledi» degen aıyptardy moıyndamady.

Sondaı-aq, ol bıznesmen jáne «Galanz bottlers» AQ negizin qalaýshy Túrsynǵalı Alagózovqa qatysty epızod boıynsha barlyq aıyptaýlardy joqqa shyǵarady.

«Alagózov boıynsha esh kináni moıyndamaımyn, ozbyrlyq ta, reıderlik te, Alagózovke eshqandaı fızıkalyq, moraldyq zorlyq-zombylyq bolǵan joq. Men jaı ǵana bárin qaıtaryp, úıge qaıtqym keldi. Áli de óz úıime barǵym keledi», - dep tolyqtyrdy aıyptalýshy.

Buǵan deıin Gúlmıra Satybaldy jábirlenýshimen urlaý isi boıynsha mámilege kelgen bolatyn.

Aıgúl Mekeshevaǵa «Galanz Bottlers» AQ-nyń 46,75% jáne «Maxi Bottlers» JShS jarǵylyq kapıtalyndaǵy úlesiniń 25% berilse ǵana óz talaptarynan bas tartady.

Aıyptaý nusqasy boıynsha, Gúlmıra Satybaldy moraldy qysym kórsetip, Tursynǵalı Alagózovty «Galanz bottlers» AQ aktsııalarynyń 43,25%-yn óziniń senimdi tulǵalaryna qaıta jazýǵa májbúr etken.

Sodan keıin Gúlmıra Satybaldy komandasy «Maxi shaı» taýar belgisin AQ-dan «Maxi Bottlers» JShS kompanııasyna aýystyrǵan, ony sol kezdegi qyzmetkeri Aıgúl Mekesheva (ekinshi jábirlenýshi – red.) rásimdegen.

A. Mekeshevanyń aldyna kompanııany defolttan shyǵarý mindeti qoıylǵan, sol úshin «Galanz bottlers»AQ 5% ýáde etilgen.

Aıyptaýshylardyń tujyrymynsha, Aıgúl Mekesheva tapsyrmany oryndaǵan soń ony urlap áketip, JShS-ni Satybaldynyń senimdi adamdaryna qaıta jazýǵa májbúrlegen.

Eske salaıyq, G.Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergelgen edi.

Jábirlenýshige kelgen zalal somasy - 6,6 mlrd teńgeden asady.

Buǵan deıin belgili bolǵandaı, Antıkor Gúlmıra Satybaldy adam urlaý faktisi boıynsha tergelip jatqanyn habarlady.

Ótken jyly 18 naýryzda elorda soty Gúlmıra Satybaldyny 2 aı merzimge qamaýǵa sanktsııa bergen edi.

Gúlmıra Satybaldy - Qaırat Satybaldynyń burynǵy áıeli.