Gúlmıra Satybaldynyń isi: sotta jábirlenýshiniń taǵy bir aǵasy sóz sóıledi
Qasym Júnisovtyń sózinshe, 2019 jyldyń 13 aqpanynda Baur Kazakhstan kompanııasynyń keńse menedjeri Indıra Ábdiramanova telefon soǵyp, Gúlmıra Satybaldynyń keńsege shuǵyl kelýin surap jatqanyn jetkizgen.
«Men tez jınalyp keńsege keldim. Gúlmıra Satybaldanyń kabınetine kirgen kezde, onda birneshe adam boldy. Atap aıtar bolsam, baýyrym Abaı Júnisov, Aıbatyr Jumaǵulov, Aıgúl Mekeshova, Baqyt Qabenov, Ǵanı Bekbosynov («Arııa-Jańa Astananyń» bas dırektory) ústel basynda otyrdy. Al, Gúlmıra Satybaldy turyp turdy. Abaıdyń janynan oryn alýymdy buıyrdy. Osydan keıin Gúlmıra ómirimde estimegen sózderdi aıtyp, baýyryń 5 mıllıard teńge urlady dep aıqalady. Men shoshyp kettim. Abaıdyń eńsesi túsip, kóńilsiz otyrdy. Ol Abaıdyń kompanııadan osynshama somany urlaǵanyn maǵan jáne taǵy eki qatysýshynyń rastaýyn talap etti. Biraq men munyń bárine shydamaı, oǵan qol qoıa almaıtynymdy, Abaıdyń onymen uzaq ýaqyt jumys istep júrgenin jáne bul aqshany urlamaǵanyn aıttym. Sodan keıin ol Mekeshovaǵa rastaıtyn qujattardy usynýdy tapsyrdy. Ol oǵan eki saǵat ýaqyt beretinin jetkizdi. Mekeshova bir apta qajet ekenin aıtty. Sonda Gúlmıra qatty ashýlanyp, bandıtterge Abaıdy soqqyǵa jyǵýǵa buıryq beretinin aıtyp, qorqytty», - dep eske alady Qasym Júnisov.
Ol biraz ýaqyttan keıin aǵalarymen birge bosatylyp, Abaı Júnisovti Mádı Batyrshaev pen basqa da adamdar ertip, óz úıine alyp ketkenin atap ótti.
«Kelesi kúni, ıaǵnı aqpannyń 15-de tańerteń aǵam men anam úsheýmiz Abaıdyń úıine bardyq, bizdi kirgizbedi. Mádı Batyrshaevtyń ruqsatymen kirýge bolatynyn bildik. Sodan soń men Gúlmıramen kezdesý úshin keńsege bardym. Sol jerde ol maǵan: «Eger aǵańdy bosatyp alǵyń kelse, búkil dúnıe-múlkińdi satyp, týystaryńa habarla», - dedi ol.
Odan ári jábirlenýshiniń aıtýynsha, kompanııanyń advokaty Dinmuhamed Jumadilda onymen habarlasyp, úsh úıdiń qujattaryn berýdi talap etken.
«Kelesi kúni túski ýaqytta úıime bir jigit kelip, ózin Valentın Kazımırov dep tanystyryp, meniń úıimdi baǵalaǵysy keletinin aıtty. Ol barlyq bólmelerdi qarap shyqty, úıdi jáne búkil aýmaqty sýretke túsirdi, sodan keıin eshteńe aıtpastan ketip qaldy. Onyń egjeı-tegjeılerin surap úlgermedim. Tústen keıin bir áıel kelip, barlyq bólmelerdi túsire bastady. Onyń da baǵalaýshy ekenin túsindim. Ol da eshteńe aıtpastan ketip qaldy», - dep qosty ol.
Onyń sózinshe, 2019 jylǵy 18 aqpanda Gúlmıra Satybaldy Qasymǵa ózi telefon soqqan, keıin Land Cruiser 200 kóligin satyp, qolyna 22 mln teńge alǵany týraly qolhat jazǵan.
«19 aqpanda ol maǵan telefon soǵyp, úıimniń 180 myń dollarǵa baǵalanǵanyn aıtty. Ol ýaqytta dollar baǵamy 376,6 teńge edi. Teńgege aýdarǵanda 68 mln teńge bolatyn. Birneshe kúnnen keıin meni Jarokov kóshesindegi notarıaldyq keńsege shaqyrdy, áıelim ekeýmiz sonda bardyq, Jumadilda men Qabenov bizdi sol jerden qarsy aldy. Biz satyp alý shartyna qol qoıdyq. Sol jerge meniń qudamnyń dosy aqsha ákeldi, meniń kózimshe aqshany solarǵa berdi. Sodan Qabenovtan bul aqshanyń kimdiki ekenin suradym, ol G.Satybaldyǵa beremin dep jaýap berdi», - dep naqtylady ol.
Qasym Júnisovtiń aıtýynsha, barlyq dúnıe-múlkin aýdarǵannan keıin, olar Gúlmıra Satybaldyǵa telefon soǵyp, Abaı Júnisovke barýǵa ruqsat alǵan. Qasym Abaıdy kórýge anasy men inisi Altaıdy ertip barǵan.
«7 naýryzda aǵam men anam Kenesary han kóshesindegi Abaıdyń úıine bardyq. Onda beıtanys adamdar boldy. Úıge kirdik. Abaı qarańǵyda jatyn bólmesinde jatty. Uzaq sóılesýge múmkindik bolmady. Anam jylap jiberdi. Óledi dep qoryqty, óıtkeni tamaq ta bolmady. Anam Qaırat Satybaldynyń anasymen kezdeskisi keletinin aıtty. Basynda bul ıdeıaǵa qarsy bolǵanbyz, keıin kelistik. Men ony Satybaldynyń anasynyń keńsesine aparyp, kólikte kúttim. Sodan bir saǵattan keıin anam shyǵyp, onyń sýyq qandy ekenin, eshteńe ýáde etpegenin jáne 7-10 kún ishinde jaýap beretinin jetkizdi. Alaıda, jaýap bolmady. Birneshe kúnnen keıin Altaı aǵam Qaırat Satybaldynyń barlyq kompanııalarǵa aýdıt júrgizgisi keletinin aıtty», - dep qosty Qasym Júnisov.
Júnisovtyń sózinshe, olardy shyndyq detektorymen tergeý júrgizgen.
Buǵan deıin sot otyrysynda kásipker Abaı Júnisovtiń aǵasy Altaı Júnisovtyń sóılegen bolatyn.
Eske salaıyq, Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr. Onymen birge onyń kómekshisi ári júrgizýshisi Mádı Batyrshaev ta otyr.