Gúlmıra Áshirbekova: Endigi mindet - tabysty elge aınalý

QYZYLORDA. QazAqparat - Memleket basshysy Nursultan Nazarbaevtyń búgingi Joldaýynda el ómirindegi ózekti máseleler qamtyldy. Atap aıtqanda, bilim, ǵylym, densaýlyq saqtaý salalarynyń qyzmet kórsetý sapasyn jaqsartý, kásibı bilikti mamandarmen qamtamasyz etý mindetterine nazar aýdaryldy. Oblystyq «Rýhanı jańǵyrý» ortalyǵynyń bólim basshysy, fılologııa ǵylymdarynyń kandıdaty Gúlmıra Áshirbekovanyń aıtýynsha, endigi kezekte sannan sapaǵa, sózden iske kóshetin ýaqyt keldi.

«Elbasy Nursultan Nazarbaevtyń Qazaqstan halqyna dástúrli Joldaýy buǵan deıingi memlekettik baǵdarlamalardy odan ári damytýdy kózdeıdi. Osy ýaqytqa deıin júzege asyrylǵan «Nurly jol», «Nurly jer», «Jol kartasy-2020», «Rýhanı jańǵyrý», «Prezıdenttiń bes áleýmettik bastamasy» jáne t.b. memlekettik baǵdarlamalar az ýaqyttyń ishinde óz nátıjesin berdi. Endigi mindet - tabysty elge aınalý», - dedi G.Áshirbekova.

Sondaı-aq, ol mektepke deıingi bilim berý, orta bilimniń sapasyn jaqsartý, JOO bitirýshileriniń jumysqa ornalasýyna baılanysty kórsetkishterdi aıqyndaý naqty nátıjege jetýge múmkindik beretinin tilge tıek etti.

«Kásipkerlikti qoldaý, agrarlyq sektor men jeńil ónerkásipti jetildirý memlekettiń básekege qabiletin arttyrady. Elimizde júzege asyrylyp jatqan reformalar men strategııalyq qujattardyń oryndalý barysy men nátıjesine Ulttyq jańǵyrý ofısi monıtorıng jasap otyrady. Sannan sapaǵa, sózden iske kóshetin ýaqyt keldi. Bir sózben aıtqanda, memlekettik qyzmetkerden bastap árbir azamat eldiń damýyna sapaly qyzmet kórsetse, naǵyz tabysty memleketke aınalarymyz sózsiz», - dedi ol.