Gúlqasıma Súıintaeva Aqtóbe oblystyq máslıhatynyń tóraǵasy bolyp saılandy

AQTÓBE. QazAqparat – Aqtóbe oblysy ákiminiń eks-orynbasary Gúlqasıma Súıentaeva oblystyq máslıhat tóraǵasy bolyp saılandy, dep habarlaıdy QazAqparat tilshisi.

Búgin oblystyq máslıhattyń 8-shaqyrylymyna saılanǵan depýtattarǵa arnaıy kýálik pen tósbelgi berildi. Olardyń arasynda buǵan deıin de depýttat bolǵandar men jańa saılanǵan azamattar bar. Aqtóbe oblystyq máslıhatynyń 34 depýtaty aralas saılaý júıesi arqyly saılandy. Partııalyq tizim boıynsha 17, birmandatty aýmaqtyq saılaý okrýgteri boıynsha 17 depýtat.

«Oblystyq máslıhat depýtattyǵyna 6 saıası partııadan kandıdattar usynyldy. Al «Saılaý týraly» Zańǵy sáıkestigi tekserilgen soń bıýlleten tizimine 5 saıası partııa engizildi. Nátıjesinde «Amanat» partııasynan 13, «Aýyl» partııasynan 2, «Aq Jol» partııasynan eki mandat bolyp bólindi. Sóıtip barlyǵy 34 depýtat tirkeldi. Onyń ishinde 9 adam 7-shi shaqyrylym depýtaty. Bul 26 % qurap otyr. Depýtattyq korpýsta 9-y áıel, 25-i er adam. Ortasha jasy – 49 jas. Eń jas depýtat 24 jasta. Úlkeni 66 jasta», - dedi Aqtóbe oblystyq aýmaqtyq saılaý komıssııasynyń tóraǵasy Nurlybek Júsipov.

Depýtattar birden jańa tóraǵany saılady. Buǵan deıin oblys ákiminiń orynbasary qyzmetin atqarǵan Gúlqasıma Súıintaeva endi oblystyq máslıhat tóraǵasy qyzmetin atqarady.

«Aldaǵy ýaqytta sizdermen birlesip birqatar jumys atqarylady. Birinshiden, áleýmettik ál-aýqat ındeksin arttyrý. Ekinshiden, saılaýshylarǵa ashyq bolý. Atqarylatyn jumystardyń eń basty mindeti – halyq aldynda boryshymyzdy abyroıly atqarý. Sondyqtan aldymen halyqtyń ál-aýqatyn jaqsartýǵa baǵyttalǵan jumystardy qolǵa alý kerek. Saılaýshylardyń depýtattarǵa qoıatyn talaby árqashan joǵary. Sol sebepten depýtattyq korpýs saılaýshylarmen jaqyn bolýǵa tıis»,- dedi oblystyq máslıhat tóraǵasy Gúlqasıma Súıintaeva.

Oblys ákimi Eraly Toǵjanov depýtat bop saılanǵan aqtóbelikterdi quttyqtap, aldaǵy jumystarymen bólisti. Onyń ishinde kóktemgi sý tasqyny kezeńinen keıingi jumystar, jol qurylysy men «Aýyl amanaty» jobasynyń iske asyrylýyna toqtaldy.

«Árbir saılaýdyń ár jaǵynda halyqtyń múddesi jatyr. Ózderińiz qoıan-qoltyq aralasyp, halyqtyń bel ortasynda júrdińizder. Talaı áleýmettik-ekonomıkalyq suraqty kóterdińizder. Bárińizdi oblystyq máslıhat depýtaty mandatyna qol jetkizgenińiz úshin quttyqtaımyn. Men Aqtóbe oblysynyń halqyna erekshe rahmet aıtamyn. Úlken saıası naýqanǵa bir úıdiń balasyndaı qatysty»,- dedi oblys ákimi Eraly Toǵjanov.

Aıta keteıik, saılaý kezinde aqtóbelikterdiń 58% óz tańdaýyn jasady.