Grýzııanyń Gorı qalasynda Qazaqstannyń qurmetti konsýldyǵy ashyldy

GORI. QazAqparat – Grýzııanyń Shıda Kartlı tarıhı-geografııalyq ólkesin qamtıtyn eń kóne qalalardyń biri Gorıde Qazaqstannyń Qurmetti konsýldyǵynyń saltanatty ashylý rásimi ótti, dep habarlaıdy QazAqparat Syrtqy ister mınıstrligine silteme jasap.

Іs-sharaǵa Grýzııa Syrtqy ister mınıstrliginiń, atqarýshy bıliktiń, Shıda Kartlı aımaǵynyń akademııalyq jáne isker toptarynyń ókilderi qatysty.

Qazaqstan Elshisi Málik Myrzalın óziniń quttyqtaý sózinde bul taǵaıyndaý eki el qatynastarynyń joǵary deńgeıiniń jáne olardy nyǵaıtý baǵytynyń kezekti dáleli bolyp tabylatynyn atap ótti.

«Qurmetti konsýlǵa, eń aldymen, iskerlik, mádenı-gýmanıtarlyq, sporttyq jáne týrıstik baılanystardy damytýda mańyzdy ról beriledi. Bul rette, árıne, qazaqstandyq azamattarǵa kómek kórsetýge jáne olardyń Grýzııadaǵy múddelerin qorǵaýǵa, túrli birlesken is-sharalardy ótkizýge aıryqsha kóńil bólinýi tıis», - dedi Elshi.

Shıda Kartlı aımaǵynyń gýbernatory Mıhaıl Shakýlashvılı óz aımaǵynyń astanasy – Gorı qalasynda Qurmetti konsýldyq ashý týraly sheshim qabyldaǵany úshin Qazaqstan tarapyna alǵysyn bildirdi. Ol atalǵan mekeme eki memlekettiń óńirleri men qalalary arasyndaǵy ekonomıkalyq yntymaqtastyqty, ınvestıtsııalardy keńeıtýge, týrızmdi jáne ǵylymı-mádenı almasýdy damytýǵa yqpal etetinin málimdedi.

Gorıdegi Qurmetti konsýl laýazymyna uzaq ýaqyt Qaraǵandy qalasynda turǵan belgili grýzın kásipkeri Iraklı Kakaladze taǵaıyndaldy.

Aıta ketý kerek, bul – Qazaqstannyń Grýzııadaǵy tórtinshi qurmetti konsýldyǵy.