Grýzııada eki kúnnen beri narazylyq sherýi ótip jatyr

ASTANA.QazAqparat - Grýzııa parlamenti seısenbi kúni birinshi oqylymda maquldaǵan «shetel agentteri» týraly zańǵa baılanysty bastalǵan Tbılısı ortalyǵyndaǵy narazylyq aktsııasy ýshyǵyp, ekinshi kúnge jalǵasty, dep habarlaıdy QazAqparat VVS-ge silteme jasap.

Birneshe saǵat boıy myńdaǵan adam qatysqan ereýil salystyrmaly túrde tynysh ótti. Jergilikti ýaqyt boıynsha tún ortasyna bir saǵat qalǵanda, narazylyq bildirýshilerdiń bir bóligi parlament ǵımaratyn qorshaı bastaǵanda jaǵdaı ýshyqty.

Áleýmettik jelilerde narazylyq bildirýshilerdiń parlament ǵımaratynyń terezelerin syndyrmaq bolǵany, polıtsııa men arnaıy jasaqtyń sý atqyshtar, dybys shyǵaratyn granatalar men kózden jas aǵyzatyn gaz qoldanyp jatqanyn kórsetetin beınematerıaldar paıda boldy. Grýzııa bıligi narazylyq kúsh kórsetý sıpatyna ıe boldy dep málimdedi.

Osydan keıin arnaıy jasaq narazylyq bildirýshilerdi parlament janyndaǵy alań men mańyndaǵy kóshelerden yǵystyryp shyǵarýǵa kiristi.

Tún ortasynan keıin arnaıy kúshter Rýstavelı dańǵylyndaǵy aktsııany taratyp, Parlamentke qarama-qarsy aýmaqty tolyǵymen basyp aldy.

Grýzın aqparat quraldarynyń habarlaýynsha, narazylyq bildirýshiler arasynda arnaıy jasaqtan qashqan kezde paıda bolǵan gaz, tútin jáne tóbelesten zardap shekkender kóp. Qamaýǵa alynǵandar da bar.