Grýzııada «demalys kúngi karantın» engiziledi

TBILISI. QazAqparat – Grýzııada dúkender men qoǵamdyq kólikter qaıta iske qosylǵannan keıin «demalys kúngi karantın» engiziledi. Tbılısı, Batýmı, Gorı, Telavı, Potı jáne Zýgdıdı qalalarynda senbi jáne jeksenbi kúnderi qoǵamdyq kólik júrmeıdi jáne meıramhana, dúken men bazarlar jumys istemeıdi, dep habarlaıdy QazAqparat Newsgeorgia saıtyna silteme jasap.

Úkimet ákimshiliginde ótken brıfıngide Grýzııanyń densaýlyq saqtaý mınıstri Ekaterına Tıkaradze epıdemıologııalyq jaǵdaıdy saqtaý úshin aptasyna eki kún adamdardyń júrisi tómen bolýy mańyzdy ekenin túsindirdi.

Onyń aıtýynsha, kóptegen elderdiń tájirıbesin eskere otyryp, shekteýlerdi aptasyna eki kún qoldaný týraly sheshim qabyldandy. Bul senbi jáne jeksenbi bolýy mindetti emes. 1 aqpannan bastap Grýzııada 28 qazannan bergi birqatar shekteý alynyp tastalady – tek azyq-túlik dúkenderi men saýda ortalyqtary ǵana emes, barlyq mekemeler jumys isteıdi.

Grýzııa sonymen qatar 2020 jyldyń naýryzynda toqtatylǵan turaqty reısterdi qaıta jańǵyrtý jóninde sheshim qabyldady.

Aıta keterligi, Adjarııada 1 aqpannan bastap mýnıtsıpaldy kólik, balabaqsha, mektep, sondaı-aq kelýshilerge kóshede qyzmet kórsetetin meıramhanalar jumysyn qalpyna keltiredi.

«Grýzııa Úkimeti Adjarııa aımaǵyn tolyǵymen ashýdy mańyzdy dep sanaıdy, onda epıdemıologııalyq jaǵdaı turaqtandy. Endi jaǵdaıdy baqylap, koronavırýstyń taralýynyń tómen deńgeıde saqtap qalý kerek», – dep atap ótti Tıkaradze.