Aldyn ala málimetke sáıkes, shildede eldiń syrtqy saýda aınalymy 2,073 mlrd dollardy qurady, bul 2024 jyldyń sáıkes kezeńimen salystyrǵanda 8%-ǵa tómen. Tómendeý eksportta da, ımportta da baıqaldy:
Import 6,7%-ǵa, - 1,464 mlrd dollarǵa deıin, al eksport 11%-ǵa, 609,1 mln dollarǵa deıin tómendedi.
Solaı bolǵanymen Grýzııanyń syrtqy saýdasy 2025 jyldyń alǵashqy jeti aıynda turaqty ósýin kórsetti. Jalpy taýar aınalymy 14,154 mlrd dollardy qurady, bul ótken jyldyń qańtar-shilde aılarymen salystyrǵanda 10,3%-ǵa artyq.
Import 10,8%-ǵa ósip, 10,31 mlrd dollardy qurady, eksport 8,9%-ǵa ósip, 3,844 mlrd dollarǵa jetti.
Qańtar-shilde aılaryndaǵy saýda teńgeriminiń teris saldosy 6,466 mlrd dollardy qurady, bul syrtqy saýda aınalymynyń 45,7%-yna teń.
Sarapshylar atap ótkendeı, tómendeý eń aldymen maýsymdyq faktorlarǵa, suranystyń aýytqýyna nemese logıstıkalyq keshigýlerge baılanysty.
Búginde Grýzııanyń eksport kóshbasshylarynyń úlesi turaqty bolyp qalyp otyr. Birinshi orynda – jeńil avtokólikter (aınalymy shamamen $1,21 mlrd), odan keıin baǵaly metaldar men kontsentrattar (shamamen $175 mln), úshinshi orynda alkogoldik sýsyndar (shamamen $123 mln) tur.
Bul rette eksport negizinen Qyrǵyzstanǵa (681 mln dollar), Qazaqstanǵa (414 mln dollar), Ázerbaıjanǵa (342 mln dollar) baǵyttalǵan. Al ımport negizinen Túrkııadan (1,29 mlrd dollar), AQSh-tan (1,283 mlrd dollar), Reseıden (951 mln dollar) keledi.
Grýzııa ekonomıkasy maýsymda ótken jyldyń sáıkes aıymen salystyrǵanda 6,3%-ǵa ósti, bul sáýir men mamyrdaǵy 7,5% ósimnen sál tómen.
Buǵan deıin Halyqaralyq valıýta qory (HVQ) jańartylǵan esebin jarııalap, onda Grýzııanyń ekonomıkalyq saıasatyna jáne sońǵy jyldary qol jetkizgen áserli nátıjelerine joǵary baǵa bergenin jazǵan bolatynbyz.