Grýzııa úkimeti otstavkaǵa ketti

TBILISI. TASS-QazAqparat – Grýzııa Úkimeti jańa parlamenttiń jumysqa kirisýine baılanysty otstavkaǵa ketti. Bul týraly TASS agenttigine el úkimetiniń baspasóz qyzmetinen málim etken, dep habarlaıdy QazAqparat.

«Úkimet óz ókilettigin toqtatty. Budan bylaı premer jáne onyń barlyq kabıneti óz mindetin ýaqytsha atqarýshy bolyp tabylady», - dedi baspasóz qyzmetiniń ókili.

Konstıtýtsııaǵa sáıkes, Grýzııa parlamentinde jańa úkimetti jasaqtaýǵa eki apta ýaqyt bar. Eger bul jasalmasa, el prezıdenti zań shyǵarýshy organdy tarqatyp, merziminen buryn parlament saılaýyn belgileıdi.

Aldyn ala málimet boıynsha, bılik basyndaǵy «Grýzııa armany – Demokratııalyq Grýzııa» partııasy mınıstrler kabınetin 2019 jyldyń qyrkúıeginen beri basqaryp kelgen Georgıı Gaharııany premer-mınıstr laýazymyna qaıta usynbaq.

Eske salaıyq, Grýzııada parlament saılaýy eki kezeńmen ótti – 31 qazanda jáne 21 qarashada. 3 jeltoqsanda Ortalyq saılaý komıssııasy saılaý qorytyndysyn jarııalap, oǵan sáıkes, bılik basyndaǵy «Grýzııa armany – Demokratııalyq Grýzııa» partııasy 48,22 daýyspen jeńiske jetti. Solaısha, 150 mandattyń 90-yna ıe boldy. «Grýzın armanynan» bólek, parlamentke sondaı-aq Grýzııanyń burynǵy eks-prezıdenti Mıhaıl Saakashvılı negizin qalaǵan «Birtutas ulttyq qozǵalys» partııasy ótti (27,18 paıyz daýys).

Sonymen qatar joǵary zań shyǵarý organynda kelesi partııalar bolady: «Eýropalyq Grýzııa – erkindik úshin qozǵalys» (3,79%), «Grýzııa partrıottary alıaıansy» (3,14%), «Grýzııanyń leıborıstik partııasy» (1%), «Aleko Elısashvılı azamattary» (1,33%), «Gırchı» (2,89%), «Lelo Grýzııa úshin» (3,15%) jáne «Georgıı Vashadze – Agmashenebelı strategııasy blogy» (3,15%).