Grýzııa Ǵashyqtar kúnin qazaqstandyqtarmen birge toılaıdy
Qaraǵandy týmasy jazýshy Marııa Şegolıhına 7 jyldan beri Tbılısıde turady. Shyǵarmashylyq shabytynyń basty kózine aınalǵan jary Mıhaıl Sebýa ertegi keıipkeri sekildi súıiktisin óz otanyna taýly ólkege alyp ketken. Kele-kele Marııanyń Grýzııaǵa degen súıispenshiligi de artty. Sol sebepten erli-zaıyptylar úshin 15 sáýirdiń orny bólek.
«Bizdiń tanysýymyz kezdeısoq jaǵdaı emes, bul mańdaıymyzǵa jazylǵan dep oılaımyz. Jaratqannyń ózi ony Qaraǵandyǵa ákelip, al meni ol toqtaǵan jerge ertip kelgen. Árıne, oǵan ǵashyq bolǵanymdy túsindim, onyń arqasynda Grýzııaǵa boı úırettim, súıispenshiligim kúsheıdi. Ol maǵan osy eldi syıǵa tartqan ispetti. Osymen mahabbatym on eki jyl boıy jalǵasyp keledi», - deıdi jazýshy Marııa Şegolıhına
«Búgin, 15 sáýirde Grýzııa ǵashyqtar kúnin atap ótip jatyr. Bul data Qazaqstanda da Ǵashyqtar kúni ekenin bilip, tańǵaldyq. Osy meıramdy mindetti túrde toılaımyz. Qazaqstan men Grýzııadaǵy búkil ǵashyqtardy osy merekemen quttyqtaımyn. Bul - elderimizdi biriktiretin meıram», - dedi Mıhaıl Sebýa.
Grýzııada ǵashyqtar kúnin toılaýdy osydan 24 jyl buryn jýrnalıst Besık Chýbınıdze usynypty. Osylaısha ol jan jaryna erekshe syı jasamaq bolǵan. Al el parlamenti osy bastamasyn qoldap, 15 sáýirdi Ǵashyqtar kúni retinde bekitken.
«Qazaqstanda da 2011 jyldan beri ǵashyqtar kúni atalyp júrgenin estip, rıza boldym. Mahabbattyń tili de, ulty da joq, ol ǵashyqtar arasyndaǵy joǵary sezim. Grýzııa jerinen búkil qazaqstandyqtardy osy merekemen quttyqtap, mol baqyt, zor densaýlyq tileımin» ,- dedi jýrnalıst Besık Chýbınıdze.
Bul kúni, árıne, gúl men syılyq satatyn dúkenderdiń saýdasy qyzyp tur. Tbılısıde Ǵashyqtar úshin arnaıy sharalar kontsertter, kınokórsetilimder men saıahattar uıymdastyrylǵan. Alǵashynda bul mereke batyseýropalyq Valentın kúnine balama retinde oılastyrylǵan edi. Alaıda grýzınder jańa meıramdy qýana qabyldaǵanmen, eskisin de áli esten shyǵara qoımaǵan.