Grýzııa COVID-19 taralý qarqyny boıynsha álemde birinshi orynǵa shyqty

TBILISI. NOVOSTI-GRÝZIıA-QazAqparat - Grýzııa sońǵy jeti kúnde 100 myń adamǵa shaqqanda bir táýlikte koronavırýs juqtyrý sany boıynsha álemde birinshi orynda, al adam ólimi boıynsha tórtinshi orynda tur. Bul derekterdi The New York Times keltirdi, dep habarlaıdy QazAqparat «Novostı-Grýzııa» agenttigine silteme jasap.

Basylymnyń deregine sáıkes, Grýzııada aýrý juqtyrýdyń ortasha táýliktik kórsetkishi 3 758 adamdy, al qaıtys bolǵandar sany – 36 adamdy quraıdy. Grýzııa qazir koronavırýstyń tórtinshi tolqynynda tur. Sońǵy 24 saǵatta elde 5697 adam aýrýǵa shaldyǵyp, 54 adam COVID-19-dan kóz jumdy. Bul pandemııa bastalǵan ýaqyttyń ishindegi rekordtyq kórsetkish.

Dúısenbi kúni bılik jańa shekteýler engiziletinin jarııalady. 10 tamyzdan bastap elde tek jabyq keńistikte emes, 5 adam jınalatyn ashyq aýada da maska taǵý mindetteldi. Úılený toıyna, jerleý rásimine, mereıtoılar men basqa da sharalarǵa salynǵan tyıym qatty qadaǵalanady. Sondaı-aq, túngi ýaqytta klýbtar men meıramhanalardyń jumysyna ruqsat etilmeıdi.

Vaktsınanyń tek bir dozasyn alǵandar sany 7 tamyzda 664 997 adamǵa jetti. Bul Grýzııa halqynyń 17,8%-yn ǵana quraıdy. Eki dozasyn da 204 234 azamat (5,3%) aldy.