Grýzııa áýe kompanııasy Astana-Batýmı reısin qaıta iske qosady

ASTANA. QazAqparat - Qazaqstan azamattary men týrısterge qolaıly bolýy úshin 2018 jyldyń jaz aılarynda, 22 maýsym men 1 qyrkúıek aralyǵynda Georgian Airways grýzın áýe kompanııasy Batýmı-Astana-Batýmı baǵyty boıynsha tikeleı áýe qatynasyn qaıta jandandyrmaq, dep habarlaıdy QazAqparat Azamattyq avıatsııa komıtetine silteme jasap. 

Reısterdi juma saıyn aptasyna bir ret Embraer 190-100 áýe kemesi júzege asyrady. Sonymen qatar, osy jyly 2 shildede Tbılısı-Almaty-Tbılısı baǵytymen bir reıs ushatyn bolady. 

Qazirgi ýaqytta Qazaqstan men Grýzııa arasyndaǵy turaqty reısterdi otandyq áýe kompanııalary oryndap júr. Máselen, «Eır Astana» áýe kompanııasy Almaty-Tbılısı baǵytymen aptasyna 5 ret, Astana-Tbılısı baǵytymen aptasyna 3 ret ushsa, «SCAT» áýe kompanııasy Aqtaý-Tbılısı baǵytymen aptasyna 4 ret qatynaıdy.