Grýzııa 1 maýsymnan bastap sheteldikter úshin qurlyqtaǵy shekarany ashady

TBILISI. Grýzııa jańalyqtary-QazAqparat - Grýzııa 1 maýsymnan bastap sheteldik azamattar úshin qurlyqtaǵy shekarany ashady, dep habarlaıdy QazAqparat Grýzııa jańalyqtary portalyna silteme jasap.

Bul sheshimdi búgin, 25 mamyr kúni Grýzııa úkimet músheleri, sondaı-aq epıdemıologtar men dárigerlerden turatyn vedomstvoaralyq úılestirý keńesi qabyldady.

Endi Grýzııaǵa koronavırýsqa qarsy vaktsınanyń tolyq kýrsyn alǵany týraly qujaty men teris nátıje kórsetken PTR testiden ótkeni týraly anyqtamasy bar sheteldik azamattar kire alady.

Nemese, tek PTR test ótkeni jaıynda anyqtamamen kirýge bolady, biraq bul jaǵdaıda Grýzııaǵa kelgen azamat aldaǵy 72 saǵatta taǵy bir PTR test tapsyrýy tıis.

Koronavırýs pandemııasyna baılanysty Grýzııa qurlyqtaǵy jáne áýedegi shekarasyn 2020 jyldyń aqpan aıynda jaýyp tastaǵan.

Bir jyldan keıin, 2021 jyldyń aqpanynda el turaqty áýe qatynasyn jańartty.