Grepplıngten álem chempıony atanǵan qazaqstandyq júldesin qaıyrymdylyqqa jumsady

NUR-SULTAN. QazAqparat – Grepplıngten ótken álem chempıonatynda AIGA nusqasy boıynsha qazaqstandyq sportshy Samat Aıtpanbet jeńimpaz atanyp, 5 myń AQSh dollary kóleminde qarjylaı syıaqyǵa ıe boldy.

Osy oraıda sportshy utysynyń bir bóligin qaıyrymdylyqqa jumsady, dep habarlaıdy QazAqparat tilshisi.

Sportshynyń jasaǵan qaıyrymdylyq isi týraly Almatydaǵy balalar úıiniń tárbıelenýshilerine syılyq berý barysynda aıtyldy. Sharaǵa Samat Aıtpanbet pen armııa generaly Saǵadat Nurmaǵambetov atyndaǵy «Sagadat batyr - QTT» klýbynyń jattyqtyrýshysy qatysty.

«Aldymen alǵysymdy ózimniń jattyqtyrýshym Nursultan Orynbasarovqa bildiremin. Meni únemi qoldap, aqyl-keńesin aıtyp júredi. Osy kisiniń arqasynda men taıaýda Ystanbulda ótken álem chempıonatynda jeńimpaz atandym. Onda maǵan 5 myń AQSh dollary kóleminde syıaqy berdi, sonyń jartysyn quryltaıshysy meniń jattyqtyrýshym bolyp otyrǵan qaıyrymdylyq qoryna bergim keledi», - dedi grepplıngten álem chempıony Samat Aıtpanbet.

Sondaı-aq, sportshy atalǵan qaıyrymdylyq qordyń áleýmettik osal topqa jatatyn otbasylar men DTsP-ǵa (balalardyń tselebraldy sal aýrýy) shaldyqqan jáne jetim balalarǵa úlken qoldaý kórsetetinin aıtyp ótti.

Sol sııaqty qor qyzmetiniń arqasynda balalar úıiniń tárbıelenýshileriniń djıý-djıtsý jáne grepplıng sportymen tegin aınalysý múmkindigi týǵanyn jetkizdi.

Óz kezeginde sportshynyń jattyqtyrýshysy Nursultan Orynbasarov shákirtine ıgilikti isi úshin alǵysyn aıtyp, sportta únemi jeńistiń shyńynda kórinýine tilektistik tanytty.