Grekııadaǵy temirjol apatynan qaza tapqandar sany 57 adamǵa jetti

ASTANA. QazAqparat – Grekııa tarıhyndaǵy eń iri temirjol apatynyń qurbandary 57-ge jetti, bul san áli de ósýi múmkin, dep habarlaıdy QazAqparat Euronews-ke silteme jasap.

Larısa qalasyna jaqyn mańdaǵy temirjolda taýar tıegen poıyz ben Afına-Solonıkı baǵytyndaǵy jolaýshylar poıyzy soqtyǵysqan bolatyn. Jolaýshylar poıyzynyń ishinde bolǵan adamdardyń jaǵdaıy týraly týystary áli de aqparat ala almaı otyr.

Qutqarýshylar maıysqan, synǵan metaldar arasynan izdeýdi jalǵastyryp jatyr. AFP-tiń órt sóndirýshilerge silteme jasap habarlaýynsha, poıyzdaǵy meıramhana-vagon birden órtengen, onyń ishindegi temperatýra 1300°C-qa deıin jetken bolýy múmkin.

Eldegi qan tapsyrý ortalyqtaryna donor bolǵysy keletin adamdar kóptep baryp jatyr. Grekııanyń Qyzyl Aı ókilderiniń aıtýynsha, birinshi kúni-aq olardyń qyzmetkerleri qan quıylǵan 270 konteıner jınaǵan.

Zardap shekkenderdiń jasy – 21-26 jas aralyǵy. Olar Larısa men Salonık aýrýhanalaryna jetkizildi. «Proto Tema» basylymy 48 adam jaralanǵanyn, olardyń altaýy qarqyndy terapııa bóliminde jatqanyn jazdy.

Tragedııa Grekııa qoǵamy úshin aýyr soqqy boldy. Elde qarsylyq sharalary ótip jatyr. Temirjol qyzmetkerleri qaýipsizdikti qamtamasyz etýde burynnan kele jatqan máseleler bar ekenin aıtyp ereýilge shyqty.

Buǵan deıin Grekııanyń ınfraqurylym jáne kólik mınıstri Kostas Karamanlıs Larısa qalasy mańyndaǵy jolaýshylar poıyzynyń apatynan keıin otstavkaǵa ótinish bergeni habarlandy.

Sondaı-aq, apat sebepterine boljam jasaldy.