Grekııada temirjolshylar ereýilge shyqty, al qutqarýshylar iz-túzsiz joǵalǵandardy izdep jatyr

AFINY. QazAqparat - Grekııa kásipodaqtary nóser jaýyn astynda eldegi Hellenic Train temirjol operatorynyń shtab-páteri janynda sherý ótkizdi. Bul týraly QazAqparat Euronews-ke silteme jasap habarlaıdy.

Olar eskirgen, jetkilikti qarjylandyrylmaıtyn jáne qaýipti dep sanalatyn temirjol júıesiniń jaǵdaıyna nazar aýdarýdy talap etip, nashar jumys jaǵdaıyna narazylyq bildirdi.

Ereýil saldarynan elde poıyzdar, sonyń ishinde Afıny metrosy da toqtap qaldy. Juma kúni jańa 24 saǵattyq ereýil jarııalandy.

Grekııada eldiń kóp bóligine jete almaıtyn shekteýli temirjol jelisi bar. Kóptegen jylǵy jańartý jobalaryna qaramastan, negizgi relsti óńdeý jumystarynyń kóbi áli de qolmen oryndalady.

Mashınıster kásipodaǵynyń basshysy Kostas Genıdýnıas jol qozǵalysyn basqarýdyń zamanaýı júıesi úsh jyl buryn daıyn bolýy tıis ekenin aıtty. 2020 jyldan bastap kásipodaq ókilderi grek temirjol ınfraqurylymyna jaýapty kompanııaǵa, OSE-ge, sondaı-aq memlekettik jáne retteýshi organdarǵa zańdy habarlamalar jibergenimen, odan jaýap alǵan joq, dedi ol.

Qaza tapqandardyń týystary da bılik pen temirjol operatoryna syn aıtty.

«Olar (temirjol kompanııasy) meniń atymdy tórt ret surady, biraq maǵan eshkim qońyraý shalǵan joq. Jaqyndarym qaıtys boldy. Men aǵamnan, ákemnen aıyryldym. Muny ózgertý múmkin emes. Túsinemin», - dedi marqumnyń týysy Dımıtrıos Býrnazıs.

Qaıǵyly oqıǵa ornynda arnaıy jumystar júrgizilip jatyr.

Grekııanyń órtpen kúres qyzmetiniń málimetinshe, 56 adam iz-túzsiz joǵalyp ketken.

Grekııa tarıhynda eń aýyr temirjol apaty saldarynan resmı túrde 57 adam qaıtys boldy dep tanyldy.

Eske salaıyq, Larısa qalasyna jaqyn Tempe eldi mekeninde jolaýshylar jáne júk poıyzdary bir jolǵa túsip qalǵan. Birinshisi Afınydan Salonıkıge, ekinshisi - qarama-qarsy baǵytta ketip bara jatqan.

Soqtyǵys kezinde poıyzdardyń birinshi vagondary tolyǵymen janshylyp, soqqydan dóńgelekter men korpýs synyqtary temirjol jolynan 100 m qashyqtyqqa ushyp ketken. Oqıǵadan keıin órt shyqty.

Eldiń Infraqurylym jáne kólik mınıstri Kostas Karamanlıs kem degende 40 adamnyń ómirin qıǵan jolaýshylar poıyzy apatynan keıin otstavkaǵa ketti.

Jolaýshylar poıyzynda 350-ge jýyq adam bolǵan. Olardyń kóbi - 4 jylda alǵash ótkizilgen karnavaldan qaıtyp kele jatqan stýdentter.