Grekııa-Túrkııa shekarasynda jalańash bolǵan 100-ge jýyq bosqyn tabyldy

BRıÝSSELЬ. QazAqparat – Eýropalyq odaqtyń Frontex syrtqy shekara qaýipsizdigi agenttigi Grekııa men Túrkııa shekarasyna jaqyn jerden jalańash bolǵan 92 adamdy qutqardy, dep habarlaıdy QazAqparat tilshisi NBC News-ke silteme jasap.

Olardyń sýretteri áleýmettik jelilerge jarııalanyp, álemde qoǵam narazylyǵyn týdyrǵannan keıin eki el bir-birin mıgranttarǵa qatygezdik jasady dep aıyptady.

Grekııa polıtsııasynyń málimdeýinshe, olar er adamdardy juma kúni Grekııa men Túrkııa arasyndaǵy shekarada aǵyp jatqan Evros ózeniniń mańynan tapqan. Polıtsııa habarlamasyna sáıkes, tergeý barysynda er adamdar Grekııaǵa ózen arqyly rezeńke qaıyqpen júzip ótkeni anyqtalǵan.

Grekııa azamattaryn qorǵaý mınıstri Takıs Teodorıkakostyń aıtýynsha, mıgranttardy ol jerge Túrkııanyń áskerı polıtsııasy ákelip tastaǵan.

Al Túrkııanyń ishki ister mınıstri Ismaıl Chatakly bul aıyptaýdy joqqa shyǵaryp otyr. «Siz [Túrkııadan] adam quqyǵy buzylýynyń birde-bir jaǵdaıyn taba almaǵandyqtan, ózińiz jasaǵan qatygezdikti [muny] [Túrkııa] jasaǵandaı kórsetýge tyrysyp jatyrsyz!», - dedi ol.

Túrik úkimetiniń kommýnıkatsııalar jónindegi dırektory Fahrettın Altýn Túrkııaǵa taǵylǵan aıypty «grek jalǵan jańalyqtar mashınasynyń» ónimi dep atady.

BUU bosqyndar isi agenttigi adamdarǵa jasalǵan osyndaı qatygezdikti jáne ar-namysty qorlaıtyn qarym-qatynasty aıyptap, bul oqıǵany tergeýge shaqyrdy.

Frontex málimeti boıynsha, osy jyldyń alǵashqy toǵyz aıynda EO shekarasyna zańsyz kirýdiń 230 myńǵa jýyq faktisi tirkeldi, bul ótken jyldyń sáıkes kezeńimen salystyrǵanda 70% kóp jáne 2016 jyldan bergi eń joǵary kórsetkish.

Foto: Reuters