Grek-rım kúresinen bas bapker olımpıadashylardyń psıhologııalyq daıyndyǵy týraly aıtty

NUR-SULTAN. QazAqparat – Grek-rım kúresinen Qazaqstan quramasynyń bas bapkeri Baqtııar Baıseıitov Tokıo Olımpıadasynda sportshylardyń psıhologııalyq daıyndyǵy týraly aıtty, dep habarlaıdy QazAqparat.

«Bizdiń sport – jekpe-jek. Onda árbir sportshy – jeke tulǵa. Bireý qatty kúıip ketýi múmkin, bireý ońaı qabyldaıdy. Úreı bolady. Keıde bul paıdaly bolýy múmkin, biraq adam qatty kúıip ketse, qaıda ekenin umytyp, tez sónýi múmkin. Bul da nátıjege yqpal etedi», - dedi Baqtııar Baıseıitov Ortalyq kommýnıkatsııalar qyzmetindegi onlaın brıfıngide.

Onyń aıtýynsha, barlyq jaǵdaıǵa, sportshylardyń psıhologııalyq daıyndyǵyna taldaý jasalady.

«Árıne, jospar boıynsha qalaı jumys isteımiz, qandaı qatelikterdi joıý kerektigin federatsııamen birge taldaımyz», - dedi Baqtııar Baıseıitov.

Buǵan deıin bas bapker 87 keli salmaqtaǵy Nursultan Tursynovtyń tóreshiler qateliginen jeńilgenin aıtqan edi.

Onyń aıtýynsha, Nursultan jasaǵan ádis baǵalanbaı qaldy. Tóreshiler oǵan eki upaıdy bergende, Nursultan jeńiske jeter edi.

Sondaı-aq, Baqtııar Baıseıitov Tokıo Olımpıadasynda sportshylardyń sátsiz oıyny úshin qazaqstandyqtardan keshirim surady.