Grek ormanyn órtegen otshashý: ıAhta kapıtany kináni óz moınyna aldy

<p>ASTANA. KAZINFORM&nbsp;&mdash; Bıyl 23 maýsymda Gıdra aralyndaǵy qaraǵaıly ormanda otshashýdyń arty órtke ulasty. ıAhtanyń kapıtany jaýapkershilikti óz moınyna aldy. Bul týraly <a href="https://www.ekathimerini.com/news/1245858/yacht-captain-takes-full-responsibility-in-hydra-fire-case/" target="_blank" rel="noopener">Ekathimerini</a> basylymy habarlaıdy.&nbsp;</p>

Basylymnyń málimetinshe, Qazaqstan azamattary demalǵan Persephoni I jeke ıahtasynyń kapıtany kinásin tolyq moıyndaǵan. 

«Qolda bar málimetterge sáıkes, tutqyndalǵan kapıtan 2 tamyzda óz erkimen tolyq jaýapkershilikti moınyna alyp, ekıpajdyń qalǵan múshelerin jáne sheteldik ıahta jaldaýshylaryn aqtap, qosymsha aıǵaq keltirdi», — dep jazady basylym.

Aıtýynsha, kapıtan teńiz jartasyna 15 otshashý jıyntyǵyn ornatqan.

Onyń ishinde 14 otshashý araldan alysta janǵan, biraq bir otshashý qarama-qarsy ushyp, araldyń tik baýraıyna túsken, saldarynan órt shyqqan. 

Sonymen qatar kapıtan qonaqtardy tań-tamasha etkisi kelgendikten ózge ekıpaj músheleriniń kómeginsiz jáne ıahtany jalǵa alýshylardyń buıryǵynsyz óz betimen áreket etkenin moıyndaǵan. 

Odan bólek, ıahta kapıtany oqys oqıǵadan keıin dúrbeleńge túskenin, sondyqtan alǵash tergeý barysynda basqasha paıym ustanǵanyn aıtqan. 

Eske sala keteıik, Grekııanyń Gıdra aralyndaǵy orman órtinen keıin 13 adam qamaýǵa alyndy.

Keıin el bıligi órttiń shyǵýyna «Persefonı» ıahtasynan ushyrylǵan otshashý sebep bolǵanyn málimdedi. 

Sondaı-aq, ıahta ekıpajynyń 11 múshesi kepilmen bosatylǵanyn habarlaǵan edik. 

Aıta ketsek, elimizdiń Syrtqy ister mınıstrligi Grekııadaǵy órtke qatysy bar dep ustalǵandardyń arasynda qazaqstandyqtar joq ekenin jetkizgen edi.