GRECO atqarýshy hatshysy Nur-Sultandaǵy Antikor Ortalygy jumysymen tanysty
Nur Sultanǵa saparynyń alǵashqy kúninde Djanlýka Espozıto elordadaǵy Tsıfrlyq halyqqa qyzmet kórsetý ortalyǵynda, QR Sybaılas jemqorlyqqa qarsy is-qımyl agenttiginiń Nur-Sultan qalasy boıynsha departamentinde, osy departament ǵımaratynda ornalasqan Antikor Ortalygy-nda boldy. Ortalyqtyń jumysymen ony Sybaılas jemqorlyqqa qarsy is-qımyl agenttiginiń tóraǵasy Alık Shpekbaev tanystyrdy.
«Ózderińizge belgili, Qazaqstan jaqynda sybaılas jemqorlyqqa qarsy memleketter toby - GRECO qataryna engen bolatyn. Bul - meniń GRECO atqarýshy dırektory retindegi Qazaqstanǵa alǵashqy saparym. Úkimetterińizdiń jasap jatqan tehnologııalyq sıpattaǵy qadamdary meni tamsandyryp otyr. Tańerteń Halyqqa qyzmet kórsetý ortalyqtaryna bardym. Aıta ketý kerek, tsıfrlandyrý - sybaılas jemqorlyqty azaıtýdyń bir ádisi. Elektrondy úkimet aıasynda kórsetiletin barlyq qyzmetter men jobalar óte mańyzdy jáne qajet», - dedi Djanlýka Espozıto Antıkor ortalyǵynda tilshilerdiń suraǵyna jaýap bere otyryp.
Esterińizge sala keteıik, búginde Nur Sultan qalalyq sybaılas jemqorlyqqa qarsy is-qımyl departamenti - elde birinshi bolyp «Open space» formatyna ótken quqyq qorǵaý organy. Sondaı-aq, sheteldik qonaqqa «Astana - adaldyq alańy» jobasy aıasynda ashylǵan «Ashyq bıýdjetterdiń ınteraktıvti kartasy» jobasy tanystyryldy. Bul bıýdjet qarajatynyń jumsalýyn qoǵam bolyp baqylaýǵa múmkindik beredi.
Aıta ketsek, 2020 jyldyń 1 qańtarynan bastap Qazaqstan GRECO-ǵa múshe 50-shi memleket atandy. Qazirgi ýaqytta GRECO quramyna Eýropa, Soltústik Amerıka men Azııa qurlyqtarynda ornalasqan, jalpy sany shamamen 1,2 mıllıard adam turatyn memleketter kiredi.