Grantpen bilim alǵan túlekter aýdandardaǵy laýazymdarǵa konkýrssyz taǵaıyndalady

ASTANA. QazAqparat – Bıyldan bastap memlekettik grantpen joǵary oqý ornyn aıaqtaǵan túlekter aýdandardaǵy tómengi laýazymǵa konkýrstan ótpeı taǵaıyndalady. Bul týraly Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi

«Memleket basshysy memlekettik qyzmetke kirýde artyq kedergilerdi joıý jáne memlekettik qyzmetten shyǵý tártibin jeńildetýdi tapsyrǵan bolatyn. Osyǵan baılanysty zańǵa ózgerister engizildi. Birinshiden, memlekettik grantpen oqý oryndaryn aıaqtaǵan túlekterimiz aýdan men aýylda tómengi laýazymdarǵa konkýrstyq irikteýsiz tikeleı taǵaıyndalatyn bolady», - dedi ol agenttiktiń keńeıtilgen alqa otyrysynda.

Onyń atap ótýinshe, bul bilikti jastardy memlekettik qyzmetke yntalandyrýǵa, jas mamandardyń aýdan men aýyldyq aımaqtarǵa oralýyna, sonymen qatar óńirlerdegi kadr tapshylyǵyn azaıtýǵa septigin tıgizip, memlekettik qyzmetke kirýdi jeńildetedi.

«Bul zań qabyldandy. Bıyl bitiretin túlekterimiz osy qaǵıdamen jumysqa ornalasady», - dedi Darhan Jazyqbaev.