Grantqa qujat qabyldaý túngi ýaqyttarda da júrgiziledi – mınıstrlik

ASTANA. QazAqparat – Talapkerlerden grantqa qujat qabyldaý túngi ýaqyttarda da júrgiziledi. Muny QazAqparat tilshisiniń saýalyna jaýap bergen Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Nurbek Saparqojaev aıtty.

«Talapkerlerden grantqa qujat qabyldaý túngi ýaqyttarda da júrgiziledi. Degenmen myna máselege toqtalǵym keledi: Eger adamdardyń barlyǵy túngi ýaqytty tańdap, jappaı qujat tapsyrsa, onda portaldyń júktemesi kóbeıedi. Tıisinshe, aqaý shyǵýy yqtımal. Júkteme artyp ketse, onda portal barlyq qujatty qabyldaı almaıdy. Sondyqtan biz talapkerlerge mynany aıtqymyz keledi: Qujat tapsyrý kezinde ol kóp jútelip jatsa, onda qaıta-qaıta tapsyra berýdiń qajeti joq. Mundaı jaǵdaılar bizde boldy. Onda bir talapker kútpeı, betti birneshe ret ashyp, júkteı bergen» - dep málim etti Nurbek Saparqojaev tilshi saýalyna jaýap bere otyryp.

Eger talapker qujatty qaıta-qaıta júktep, birneshe ret ótinish bergen bolsa, onda konkýrstyq komıssııa qujattardyń eń sońǵy nemese tolyq aqparat kórsetilgen nusqasyn iriktep alady.

Aıta keteıik, erteńnen bastap Egov.kz portaly arqyly grantqa qujat qabyldaý bastalady. Nurbek Saparqojaevtyń aıtýynsha, grant ótinish berý 13-20 shilde aralyǵynda júredi.

Eske salaıyq, buǵan deıin grantqa túsýge qansha ball jetkilikti sanalatyny týraly jazyp edik.

Qosa ketsek, bıyl bakalavrıatqa 73 myńnan asa grant bólinip otyr.