«Grant ıeleri jaqynda anyqtalady» - respýblıkalyq basylymdarǵa sholý

ASTANA. 6 tamyz. QazAqparat - Qazaq aqparat agenttigi 6 tamyz, senbi kúni respýblıkalyq basylymdarda shyqqan ózekti materıaldarǵa sholýdy usynady.

***

Keshe Aqordada Memleket basshysy Nursultan Nazarbaevtyń tóraǵalyq etýimen keńes ótti. Keńes jumysyna Premer-Mınıstr Kárim Másimov, Prezıdent Ákimshiliginiń Basshysy Aslan Mýsın, Astana, Almaty qalalary men oblystardyń ákimderi qatysty. Osyǵan oraı «Egemen Qazaqstan» gazetinde «Adamdar úshin qajettiń bári jasalýy tıis» degen taqyryppen kólemdi maqala basyldy. «Biz júzege asyryp jatqan barlyq ba­ǵyt­tar, barlyq baǵdar­la­malar qa­­rajatpen qamtamasyz et­ilgen. En­di tek tapsyrylǵan ju­mystar­dyń oryndalýyn baqy­laý ǵana qaldy. Bıylǵy jyly eko­nomıkanyń 7 paıyzdyq ósý qar­qy­nyn odan ári jalǵastyrý mindeti qoıylyp otyr. Bul - jeńil mindet emes. Biz álemdik ekono­mıkanyń turaqtylyǵyna kepildik bere al­maımyz. Kásiporynnyń iske qosy­lýy men jumys isteýi, eger bizdiń re­sýrstarǵa qatysty baǵa kon­ıýnk­týrasy ózgergen jaǵdaıda demeý bolmaq», - depti Elbasy keńes barysynda.

«Egemen Qazaqstan» gazetiniń jazýynsha, keshe Bilim berý granttaryn taǵaıyndaý jónindegi respýblıkalyq konkýrstyq komıssııa óz jumysyn bastady. Konkýrstyq komıssııanyń tóraǵasy - Bilim jáne ǵylym mınıstri Baqytjan Jumaǵulov. Komıssııaǵa Bilim jáne ǵylym, Densaýlyq saqtaý mınıstrlik­teriniń joǵary oqý oryndarynyń rektorlary kirdi. «Bilim berý granttaryn taǵaıyndaý konkýr­syna 91 018 talapker qatyssa, onyń ishinde qazaq tilinde - 66 912, orys tilinde - 24 106 talap­ker qatysty. Sondaı-aq bilim berý grant­taryn taǵaıyndaý konkýrsyna 3070 «Altyn belgi» ıegerleri, 1240 halyqaralyq olımpıadalar men ǵylymı jarystardyń, oryndaýshylardyń res­pýb­lıkalyq jáne ha­lyq­aralyq konkýrstary men sporttyq jarys­tardyń jeńimpazdary qatysty. Bilim berý granttaryn taǵaıyndaý konkýrsyn ótkizý kezinde olarǵa basymdyq beriledi», dep jazady basylym búgingi nómirindegi «Grant ıeleri jaqynda anyqtalady» degen taqyryptaǵy maqalada.

***

10 tamyz kúni fýtboldan Qazaqstan ulttyq quramasynyń Astanada Sırııa komandasymen joldastyq kezdesý de synalatyny málim. Osyǵan oraı, Mıroslav Beranek jattyqtyratyn fýtbolshylarymyz Talǵarda oqý-jattyǵý jıynyn ótkizip jatyr. Keshe ulttyq quramamyzdyń jattyǵýy ashyq jaǵdaıda ótip, oǵan BAQ ókilderi de kýá boldy. Tilshiler qaýymy kýá bolǵan jaıttardy bilgińiz kelse «Aıqyn» gazetindegi «Sársenbiniń sátinde Sırııamen oınaımyz» degen maqalaǵa nazar salyńyz. «Al biz sizderdiń esterińizge Qazaqstan quramasynyń Sırııa komandasymen úsh ret kezdeskenin, ókinishke qaraı, sol kezdesýlerdiń bárinde de utylyp qalǵanyn (0:2, 0:1, 0:4 esepterimen) sala ketsek deımiz. Ózderińiz baıqaǵandaı osy oıyndardyń birde-bireýinde ulttyq quramamyzdyń jigitteri qarsylas qaqpasynan sańlaý tappaǵan eken», - dep jazady basylym.

Apta ortasynda orystildi ǵalamtor basylymdary qazaq tiliniń máselesin kóterdi. Buǵan túrtki bolǵan Mádenıet mınıstrliginiń tilge baılanysty daıarlaǵan jańa zań jobasy eken. «2013 jyldyń 1 qańtarynan bastap Qazaqstanda is-qaǵazdary tolyq memlekettik tilge kóshedi. Sheneýnikterdiń ózi memlekettik tilde «saıraýǵa» májbúr bolady eken, orys tildiler endi qaıpek?» degen yńǵaıda másele kóterilgen. Árıne, bosaǵada ógeı balanyń jaǵdaıyn keship kelgen ana tilimiz aldaǵy ýaqytta óz tuǵyryna qonsa, ıisi qazaq bórigin aspanǵa atyp, qýanary haq. Shyndyǵy sol, 1989 jyly qabyldanǵan til zańy búgingi kúnniń talabyna saı emes. Sodan bolar, qarǵa tamyrly qazaqtyń kóp jerde esesi ketip jatqany. Al jańa zań qabyldana qalsa, sol kemshilikter qalpyna keler me edi? «Aıqyn» gazetinde osy saýaldarǵa oraı mamandardyń pikirin oqyp bile alasyzdar.

***

«Qazaqstandyq mamandar turaqty mekenjaıy joq jandardy «bıologııalyq bombaǵa» teńep, dabyl qaǵyp jatyr. Qańǵybas jandardyń túneıtin orny - dala, júretin jeri - qoqys, jeıtini - qaldyq. Ondaı bolsa, olardyń ortaǵa qaýipti ekendigine eshkim daý aıtpas jáne dárigerlerdiń dabyl qaǵýlary oryndy», - dep jazady «Alash aınasy» gazeti «Bıologııalyq bomba» jarylmasyn desek...» degen taqyryptaǵy maqalasynda. Jarııalanymnyń tolyq nusqasyn búgingi nómirden oqı alasyzdar.

Osy basylymnyń turaqty «Dat!» aıdarynda QR eńbek sińirgen qaıratkeri, «Qurmet» ordeniniń ıegeri, kompozıtor Keńes Dúısekeevpen aradaǵy suhbat «Qazir áýesqoılardyń kóbeıip ketý kesirinen án óneri quldyrap barady» degen taqyryppen berilgen. Basylym tilshisiniń barlyq saýaldaryna tuşymdy jaýap bergen kopozıtor: «Jazǵan dúnıemniń barlyǵyn tamasha dúnıe dep jaryqqa shyǵaryp jatqan joqpyn. Talaı dúnıem jyrtylyp qalyp, talaı dúnıem bıik deńgeıde jetpeıdi-aý degen soń, qalyp jatady. Qazir áýesqoılardyń kóbeıip ketý kesirinen án óneri quldyrap bara jatyr. Bul tyńdaýshynyń talǵamyn buzady, tómendetedi», - deıdi.

***

«Kazahstanskaıa pravda» gazetiniń jazýynsha, Qazaqstan Respýblıkasynyń Bilim jáne ǵylym mınıstri Baqytjan Jumaǵulov Qazaqstan Respýblıkasyndaǵy AQSh-tyń ýaqytsha senimdi ókili Djon Ordveımen kezdesti. Kezdesý ǵylym salasy boıynsha áńgimeden bastaldy. AQSh dıpmıssııasynyń ókili memleketimizdiń ǵylym salasyndaǵy yntymaqtastyq áleýeti men ashyqtyǵyn joǵary baǵalady. Onyń pikiri boıynsha, Qazaqstan keńes dáýirindegi memleketter arasynda ǵylym men bilimge zor kóńil bólip otyrǵan birden-bir memleket bolyp tabylady. Qazaqstan men AQSh arasynda úkimetaralyq kelisimniń aǵymdaǵy jyldyń shilde aıynda kúshine ený barysy tóńireginde ǵylym salasyndaǵy yntymaqtastyqtyń damý bolashaǵy talqylandy.