Grant bólýde qatelikter jibergender qandaı jaýapkershilikke tartyldy - depýtat
«Bıyl mektep bitirgen túlekterge joǵary oqý oryndarynda bilim alýǵa granttardy úılestirý isi qoǵam tarapynan kóptegen narazylyq týdyrdy. Bilim jáne ǵylym mınıstrliginiń jaýapty qyzmetkerleri osy jyly «Altyn belgi» ıegerleriniń basymdyq quqyǵy bolmaıdy, bilim granty tek Ulttyq biryńǵaı testileýden joǵary ball alǵan talapkerlerge beriledi dep málimdegen. Al shyn máninde bilim granttary qoldanystaǵy «Bilim týraly» Zań men bilim grantyn berý erejesine sáıkes, «Altyn belgi» ıegerleriniń basymdyq quqyǵyn saqtaı otyryp bólindi. Osy qarama-qaıshylyq talapkerler men ata-analardyń túsinbeýshiligin týǵyzdy. «Bilim týraly» Zańynyń 26- babynyń 5-tarmaǵyna sáıkes, «Altyn belgimen» marapattalǵan túlekterdiń konkýrs ótkizý kezinde bilim berý grantyn alýǵa basym quqyǵy bar. Alaıda Bilim jáne ǵylym mınıstrligi memlekettik bilim granty konkýrsynyń nátıjesi boıynsha grant ıegerleri tizimin eki ret jarııalaǵan, ıaǵnı 10 tamyzda jáne 14 tamyzda. Birinshi tizimde mınıstrlik «Altyn belgi» belgisimen marapattalǵan túlekterdiń basymdyǵyn eskere otyryp, granttardy bólgen, al ekinshi tizimde «Altyn belgi» ıegerleri alynyp tastalyp, UBT-dan joǵary ball alǵandar grantqa ıe bolǵan. Shyndyǵyna kelgende, bunyń barlyǵy árkimniń qalaýynsha sheshile beretin emes, qoldanystaǵy zań boıynsha ádil sheshimin tabatyn másele»,- dedi Ábdimanap Bekturǵanov.
Osy oraıda depýtat kókeıindegi birneshe suraqtardy qoıdy.
«Bilim jáne ǵylym mınıstrliginiń memlekettik bilim grantyn taǵaıyndaý kezinde konkýrstyq komıssııasy qoldanystaǵy zańdy basshylyqqa almaı, endi ǵana daıyndalyp jatqan zań jobasyna silteme jasap, sheshimin nege ózgertti? Ekinshiden, 2017 jylǵy 26 shildedegi «Joǵary bilim alýǵa aqy tóleý úshin bilim berý grantyn berý erejesine ózgerister men tolyqtyrýlar engizý týraly» QR Úkimetiniń 446 qaýlysymen grant bólý konkýrsynda «Altyn belgi» ıegerleriniń basymdyq quqyǵy saqtalǵan. Endeshe, mınıstrlik sheshimi qandaı qujattarǵa negizdelgen? Úshinshiden, birinshi tizimde grant taǵaıyndalyp, ekinshi tizimde grantqa ilinbegen talapkerlerdiń máselesi qalaı sheshildi? Elimizde bir joǵary oqý ornynan alynyp tastalyp, basqa bir aımaǵynyń joǵary oqý ornyna qaıta bólingen talapkerlerdiń jaǵdaıy qalaı boldy? Bul týraly naqty aqparat joq»,- dep toqtaldy depýtat.
Budan bólek ol medıtsınalyq mamandyqtar boıynsha tapsyrysty jarııalaý kezindegi kemshilikke de nazar aýdardy.
«Nelikten medıtsınalyq mamandyqtar boıynsha bólingen memlekettik tapsyrystyń medıtsınalyq joǵary oqý oryndarynyń arasyndaǵy bólinisi qujattar tapsyrý aıaqtalýyna bir kún qalǵanda jarııalanǵan? Buqaralyq aqparat quraldarynda taralǵan málimetterge sáıkes, medıtsınalyq joǵary oqý oryndaryna túsken «Altyn belgi» ıegerine berilgen 220 grantty Densaýlyq saqtaý mınıstrligi bir kúnde jaramsyz etip tastaǵanyn qalaı túsinýge bolady? Grant bólý kezinde eki túrli buıryq shyǵaryp, qatelikter jibergen mınıstrlikterdiń jaýapty qyzmetkerleri qandaı jaýapkershilikke tartyldy?»,- dedi Ábdimanap Bekturǵanov.