Grant alǵysy kelgen túrkistandyq boıjetken 6 mln teńgesinen aıryldy
23:33, 01 Jeltoqsan 2022
TÚRKІSTAN. QazAqparat - Memleketten qaıtarymsyz grant alǵysy kelgen túrkistandyq boıjetken 6 mln teńgesinen aırylyp qaldy, dep habarlaıdy QazAqparat tilshisi.
Ony jaqyn tanysy aldap ketken. Kúdikti kásipkerlik maqsatta memleket tarapynan qaıtarymsyz 20 mln teńge alyp beretinine sendirgen. Sodan óz qyzmetine 6 mln teńge alǵan.
Jábirlenýshi óziniń aldanǵanyn 6 aıdan soń biraq túsingen.
«Atalǵan jaıt QR Qylmystyq kodeksiniń 190-baby «Alaıaqtyq» boıynsha tirkeldi.
Kúdikti boıjetken jumyssyz jergilikti turǵyn bolyp shyqty. Jalpy onyń alaıaqtyq qylmystyń 3 faktisine qatysy bary anyqtaldy. Jábirlenýshilerge keltirilgen shyǵyn kólemi 8 mıllıon teńgeni qurady. Qazirgi tańda kúdikti qamaýǵa alynyp, «Alaıaqtyq» babymen tergeý amaldary júrgizilip jatyr», - delingen Túrkistan oblysy Polıtsııa departamentiniń baspasóz qyzmeti taratqan aqparatta.