Grand Prix: Astanada para dzıýdodan halyqaralyq jarys ótedi

<p>ASTANA. KAZINFORM &ndash; Elordadaǵy Beeline Arena sport kesheninde 23-24 qarasha kúnderi para dzıýdodan Grand Prix jarysy ótedi, dep habarlaıdy qala ákimdiginiń resmı saıty.</p>

Qazaqstan ulttyq quramasynyń para dzıýdoshylary Parıj Paralımpıadasynda joǵary nátıjege qol jetkizip, 1 altyn, 1 kúmis jáne 3 qola júlde jeńip alǵan. Endi sanaýly aıdan keıin qazaqstandyq sportshylar jankúıerleriniń aldynda sheberlikterin kórsetpek.

Týrnır barysynda 10 salmaq dárejesinde júldeler sarapqa salynady. Jarystyń basty ereksheligi – jańa Olımpıada tsıkline baılanysty salmaq dárejeleriniń ózgerýi. Erler endi 70, 81, 95 jáne +95 kelide, al áıelder 52, 60, 70 jáne +70 kelide júlde úshin kúresedi.

Sonymen qatar Halyqaralyq dzıýdo federatsııasy tájirıbe retinde Olımpıada baǵdarlamasyna kirmeıtin eki salmaqta (erler – 64 keli, áıelder – 46 keli) júldeler úlestirmek.

Aıtýly dodaǵa 15 memleketten 100-ge jýyq sportshy qatysady. Qazaqstan namysyn Astana qalasynyń úsh parasportshysy J1 sanatynda qorǵaıtyn bolady.

Olar:

Asylan Nurdaýletov (73 kg);
Baýyrjan Arystanbekov (90 kg);
Erbolat Bekentaev (90 kg).

Jarystyń ashylý saltanaty 23 qarasha kúni Beeline Arena sport kesheninde saǵat 15:00-de ótedi. Al jarystar kún saıyn saǵat 10:00-de bastalady. 

Buǵan deıin Aqtóbe qalasynda dzıýdodan erler men áıelder arasynda Qazaqstan chempıonaty máresine jetkenin jazǵan edik.