Grammatıkaǵa qurt túsken kúni til óledi - Nesibeli Qurman

NUR-SULTAN. QazAqparat - Nazarbaev ýnıversıtetinde ótip jatqan halyqaralyq konferentsııada M.V. Lomonosov atyndaǵy Máskeý memlekettik ýnıversıtetiniń professory Nesibeli Qurman qazaq tiliniń grammatıkasy ózgeriske túsip jatqanyna alańdaýshylyq bildirdi, dep habarlaıdy QazAqparat tilshisi.

«Qazaq tilin HHІ ǵasyrda oqytý» taqyrybynda baıandama jasaǵan Nesibeli Qurman qazaqstandyqtar úshin «ana tili» degen uǵymnyń naqty anyqtamasy joq ekenin aıtady. Ǵalymnyń aıtýynsha, bul uǵymnyń akademııalyq ǵylym deńgeıinde naqty anyqtamasy bolmaýy tildik alýandyqqa sebep bolyp otyr.

Qazaq tiliniń aqparat dáýirinde damýyna baǵa bergen ǵalym ózge tilderden enetin termın sózderge úrke qaraýǵa bolmaıtynyn aıtty.

«Tilge bóten sóz kirse, birden eleń ete qalamyz. Biraq onyń tilge qaýpi joq. Odan da qaýipti bir úrdis bar. Ol - grammatıkanyń búlinýi. Grammatıkalyq ımmýnıteti myqty tilder syrttan qansha sóz kirse de, qurymaıdy. Al grammatıkaǵa qurt tússe, til de qurıdy. Sondyqtan aýyzeki tilde de, ádebı normada da grammatıkanyń buzylmaýyna kúsh salýymyz kerek. Ókinishke qaraı, ondaı qubylys qazirgi qazaq qoǵamynda bar» - deıdi ǵalym.