Google+ servısi jabyldy

ASTANA. QazAqparat - Google korporatsııasy Google+ áleýmettik jelisin jabýǵa sheshim qabyldady. Servıs 2 sáýirden bastap qoljetimsiz bolady, dep habarlaıdy QazAqparat tilshisi The Guardian basylymyna silteme jasap.

Google+ áleýmettik jelisin qoldanýshylardyń barlyq paraqshalary, fotosýretteri, vıdeolary óshiriledi.

Áleýmettik jeli qyzmetiniń toqtaýy Google-dyń basqa servısterine áser etpeıdi. Gmail, YouTube jáne Google karta sııaqty servıstermen baılanysty Google eseptik jazbalary jumys isteı beredi. Tek áleýmettik jeli retinde ashylǵan Google+ eseptik jazbasy joıylady.

Halyqaralyq korporatsııa «áleýmettik jelini qoldanýshylardyń tym azdyǵy jáne ony tutynýshylar talabyna saı deńgeıde ustap turýdyń qıyndyǵyna baılanysty» osy servısten bas tartatynyn málimdedi. Atalǵan «qıyndyq» osy jeli qoldanýshylardyń jeke aqparattarynyń «áshkerelenýine» baılanysty bolýy múmkin. Ony kompanııa 2018 jyldyń naýryzynda anyqtaǵan, biraq alty aı boıy qupııa saqtap kelgen.

Bastapqyda kompanııa áleýmettik jelini bıyl tamyz aıynda jabýǵa sheshim qabyldaǵan edi. Alaıda, 2018 jyldyń qarashasynda jeliniń qaýipsizdik júıesinen tabylǵan kemshilik ony jyldamdatýǵa sebep boldy.