«Google salyǵy» boıynsha Qazaqstan bıýdjetine 3 mlrd teńge aýdaryldy

NUR-SULTAN. QazAqparat - QR Qarjy mınıstrligi Memlekettik kirister komıteti Tsıfryq aktıvter basqarmasynyń basshysy Nurjan Qýandyqov «Google salyǵy» boıynsha bıýdjetke túsken qarajat týraly aıtty, dep habarlaıdy QazAqparat tilshisi.

«Qazirgi kezde elimizdiń azamattaryna taýar ótkizip, qyzmet kórsetip jatqan 30-dan astam kompanııa tirkeldi. Atalǵan salyq normasy boıynsha birinshi toqsanda 2,6 mlrd teńge tólendi. Al bıyldyń 8 aıynda bıýdjetke 3 mlrd teńgege jýyq qarjy tústi. Ekinshi toqsan boıynsha salyq tóleıtinder 25 tamyzǵa deıin rásimderdi júrgize alady. Bul salyqty tek shetel kompanııalary tóleıdi. Al Qazaqstan azamattary osy salyqty tólemeıdi», - dedi N. Qýandyqov onlaın brıfıng barysynda.

Budan buryn habarlanǵandaı, Basqarma ınternet jelisinde Qazaqstan azamattaryna taýar satatyn shetel kompanııalary tóleıtin salyqqa qatysty túsinik berdi.

Budan buryn habarlanǵandaı, 2022 jylǵy 1 qańtardan bastap Salyq kodeksiniń Qazaqstan aýmaǵynda ornalasqan jeke tulǵalarǵa satylǵan taýarlary, kórsetilgen qyzmetteri úshin sheteldik ınternet-kompanııalardyń QQS tóleý jónindegi mindettemeleri týraly normalary kúshine endi (Google salyǵy).

Ulttyq ekonomıka mınıstrliginen málim etkendeı, qyzmetteri men taýarlaryn onlaın platformalar arqyly satatyn barlyq sheteldik kompanııalar Qazaqstan bıýdjetine QQS tóleýge mindetti bolady.

Aıta keteıik, QQS mólsherlemesi satylǵan taýarlar men qyzmetter somasynyń 12% quraıdy. Munyń qazaqstandyq salyq tóleýshilerge qatysy joq.