Gonkongtan kelgen kelinshek 100 myń dollarmen ustaldy

ASTANA. QazAqparat - Almaty áýejaıynda 100 myń dollardy alyp ótpek bolǵan qazaqstandyq áıel ustaldy, dep habarlady QR Qarjy mınıstrligi Memlekettik kirister departamenti.

23 qyrkúıek kúni Almatynyń  halyqaralyq áýejaıynyń VIP zalyndaǵy kedendik baqylaý «Gonkong-Almaty» baǵytyndaǵy №930 áýe reısimen ushyp kelgen jolaýshylardyń qol júgin tekserý barysynda Almaty qalalyq Memlekettik kirister departamenti ekonomıkalyq tergeý qyzmeti men «Jetisý» kedendik beketiniń qyzmetkerleri QR azamatshasyn ustady.

Jolaýshynyń qol júginde 100 000 AQSh dollary kóleminde deklaratsııada kórsetilmegen qarajat shyqty. Atalǵan oqıǵa QR Qarjy mınıstrligi MK departamentiniń sotqa deıingi biryńǵaı tergeý tizilimine tirkeldi. Jeke tulǵalardyń kedendik odaq shekarasynan qolma-qol qarajatty alyp júrý kelisimine sáıkes, shekaradan alyp ótetin qolma-qol aqsha 10 myń AQSh dollarynan aspaýy tıis.

Sonymen birge, joǵaryda kórsetilgen normany buzǵany úshin QR Qylmystyq kodeksinde 3 myń AEK kólemindegi aıyppul nemese úsh jylǵa deıingi bas bostandyǵynan aıyrý nemese múlkin tárkilep, bas bostandyǵynan aıyrý túrinde jaza qarastyrylǵan.