Gonkongta tutqyndalǵan qazaqstandyq stýdent kepildikpen bosap shyqty

NUR-SULTAN. QazAqparat – 2020 jylǵy 15 qańtarda Gonkongtyń aýdandyq sotynda Ábilqaıyr Nýkpıdi kepildikpen bosatý qarastyrylǵan úshinshi sot otyrysy ótti. Bul jaıynda QR Syrtqy ister mınıstrliginiń Telegram paraqshasynda aıtylǵan, dep habarlaıdy QazAqparat tilshisi.

Vedomstvo málimetinshe, Á.Nýkpıdiń múddesin Baptıstik ýnıversıtet usynǵan advokat qorǵap júr.

Qorǵaýshy taraptyń dálelderin nazarǵa ala otyryp, sot Á.Nýkpıdi kepildikke bosatý týraly sheshim qabyldaǵan. Sot sheshimine sáıkes, Á.Nýkpı 2020 jylǵy 26 aqpanǵa belgilengen kelesi sot otyrysyna deıin anasymen birge Baptıstik ýnıversıtettiń kampýsynda bolyp, bekitilgen komendanttyq saǵatty saqtaýǵa mindetti.

«QR Gonkongtaǵy Bas konsýldyǵy Á.Nýkpıdiń anasyna tolyq qoldaý kórsetip, advokattarmen kelissóz júrgizýine, sot otyrystaryna qatysýyna jáne basqa da qajetti konsýldyq-quqyqtyq máselelerine kómektesýde» dep atap ótedi mınıstrlikten.

Eske sala keteıik, ótken jyldyń 18 qarashasynda Gonkong qalasynda narazylar men polıtsııa arasyndaǵy qaqtyǵys kezinde Qazaqstan azamaty ustaldy.

Osy jaıtqa baılanysty pikir bildirgen QR Syrtqy ister mınıstrliginiń resmı ókili Aıbek Smadııarov qazaq stýdentiniń soty 2020 jyldyń qańtarynda ótetinin habarlady.

«Sotyn kútip otyrmyz. Tergeý júrip jatyr. Soty kelesi jyldyń qańtar aıynyń ortasyna josparlanǵan. Ózderińiz biletindeı, ol jaqta kóp adam ustaldy. Ýaqyty kelgende soty bolady. Sol sotta sheshim qabyldanady. Advokat taptyq, týystary Gonkongqa bardy. Olarmen kezdesý ótkizdik. Quqyqtyq kómek kórsetip jatyrmyz», - degen edi Aıbek Smadııarov.