Gonkongta neırohırýrgterge kómektesetin jasandy ıntellekt modeli jasaldy

<p>ASTANA. KAZINFORM &ndash; Qytaı ǵylym akademııasy janyndaǵy Gonkongtaǵy jasandy ıntellekt jáne robototehnıka ortalyǵy neırohırýrgterge kómektesetin jasandy ıntellekt (JI) quralyn tanystyrdy. Bul týraly <a href="https://nauka.tass.ru/nauka/20207181" target="_blank" rel="noopener">TASS</a> aqparat agenttigi jazdy.</p>

South China Morning Post basylymynyń habarlaýynsha, CARES Copilot 1.0 jasandy ıntellekt úlgisi dárigerlerge kúrdeli mı operatsııalary kezinde kómektesýge arnalǵan. Ortalyq basshysy Lıý Hýnbınniń aıtýynsha, qural neırohırýrgterge «tıimdi klınıkalyq dıagnostıka júrgizýge jáne anyqtamalyq materıaldardyń jetkilikti sanyna negizdelgen medıtsınalyq qorytyndylar jasaýǵa» kómektesedi. 

CARES Copilot 1.0 Meta Platforms ázirlegen úlken Llama 2 til úlgisine negizdelgen jáne mátindik aqparatty, keskinderdi, sondaı-aq magnıttik-rezonansty tomografııa (MRT), kompıýterlik tomografııa (KT) jáne ýltradybystyq beıneleý nátıjelerin qosa, ártúrli derekqorlarda oqytylǵan. 

Lıý Hýnbın atap ótkendeı, zertteýshiler quraldy myńdaǵan medıtsınalyq oqýlyqtarmen, ǵylymı maqalalarmen jáne neırohırýrgııa boıynsha halyqaralyq nusqaýlarmen qamtamasyz etti. Klınıkalyq sheshim qabyldaý protsesi kompıýterlik tomografııa, MRT, patsıenttiń fızıologııalyq testileý qorytyndylary jáne t.b. sııaqty ártúrli aqparatqa negizdelgen. 

«Biz dárigerlerdiń JI arqyly operatsııa kezinde jaqsy jumys istegenin, durys sheshim qabyldaǵanyn qalaımyz», - dep qosty ǵalym.

Materıalda kórsetilgendeı, CARES Copilot 1.0 Gonkong pen qurlyqtyq Qytaıdaǵy keıbir medıtsınalyq mekemelerde ishki synaqtan ótti. Lıý Hýnbınniń aıtýynsha, model dárigerlerdiń jumys protsesine hırýrgııalyq josparlardy jáne otalardan keıingi basqarýdy daıyndaýǵa kómektesý úshin engizilgen.