Golovkınniń jekpe-jegi Qaraǵandyda úlken LED-ekrandardan tikeleı kórsetiledi

ASTANA. QazAqparat - 16 qyrkúıek kúni AQSh-tyń Las-Vegas qalasyndaǵy «T-Mobile» arenada orta samaq dıvızıonyndaǵy qazaqstandyq Gennadıı Golovkın men meksıkalyq Saýl Alvarestiń kópten kútken jekpe-jegi ótedi.

Ony «Qazaqstan» jáne «Qazsport» telearnalary tikeleı efırden 17 qyrkúıek kúni (ýaqyt aıyrmashylyǵyna baılanysty) kórsetedi. Belgili bolǵandaı, Golovkın men Alvarestiń aıqasy saǵat 8.50-de bastalady.

Gennadıı Golovkın týyp-ósken Qaraǵandy qalasynda jekpe-jekti tamashalaý úshin úlken LED-ekrandar ornatylady. Tikeleı translıatsııalar úsh jerde - Kenshiler mádenıet saraıynyń aldyndaǵy alańda, Jańa Maıqudyq shaǵynaýdanyndaǵy  Mádenıet úıiniń aldynda jáne Dostyq úıiniń aldynda uıymdastyrylady.

Sonymen qatar translıatsııa S.Sápıev atyndaǵy Boks ortalyǵynda da ótedi. Onda kirý aqyly bolady. Bıletterdiń quny - 500, 800, 1 500 jáne 3 000 teńge. 

Eske salaıyq, atalmysh jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn.

Qazaqstandyq boksshy óziniń "The Telegraph" gazetine bergen suhbatynda óziniń bas jekpe-jegin ákesi men baýyrlary Vadım jáne Sergeıge arnaıtynyn aıtty. 

9 qyrkúıekte Gennadıı Golovkın men onyń jubaıy Alına qyzdy boldy. Bul Golovkınniń otbasyndaǵy ekinshi bala, tuńǵyshtary Vadım segiz jasta.