Golovkınniń jasy syr bere bastaǵan sekildi - Ermaxan Ybraıymov

ASTANA. QazAqparat - Olımpıada chempıony Ermahan Ybraıymov Gennadıı Golovkın men Denıel Djeıkobs jekpe-jegine qatysty óz pikirin bildirdi.

Bul rette Ybraıymov nokaýtsyz 12 raýndqa deıin ótken kezdesýdiń naqty eki sebebin aıtyp otyr, dep habarlaıdy QazAqparat.

"Birinshiden, sońǵy kezde Gennadııge qarsy shyǵatyn boksshy tabylmaı ketti, joqtyń qasy deýge bolady. Sosyn ony "monstr" - bárin japyryp tastaıtyn boksshy retinde kóp kórsetip ketti. Dál osy mıfti seıiltip, qarsylastardyń qorqynyshyn azaıtý úshin ol barlyq 12 raýnd boıy bokstasty. Ekinshiden, erte me, kesh pe, ýaqyt ózinikin alady. Gennadıı Golovkın qazir 34-te, bıyl 35-ke keledi. Qansha aıtsaq ta, adamnyń jyldamdyǵy báseńdeıdi, kúshi sarqylady. Menińshe, ýaqyt ta bolǵan sııaqty. Adamnyń resýrstary sheksiz emes qoı", - dedi Ybraıymov QazAqparat tilshisine bergen suxbatynda.

Onyń oıynsha, Gennadıı Golovkınge sońǵy belbeýdi (qazirgi ıesi - brıtandyq boksshy Sonders) alǵannan keıin Saýl "Kanelo" Alvarestiń artynan kóp júgire bermeı, kelesi salmaq dárejesine aýysý qajet. Sebebi ol jaqta qyzyqty ári tartysty jekpe-jekter kóp.

Eske salaıyq, Gennadıı Golovkın (36-0, 33 KO) 18 naýryz kúni Nıý-Iorkte  amerıkalyq Denıel Djeıkobsqa (32-1, 29 KO) qarsy jekpe-jek ótkizip, orta salmaqtaǵy WBA (Super), IBO, WBC jáne IBF nusqalary boıynsha barlyq belbeýlerin qorǵap qaldy . Aıqastan keıin Golovkın osy jolǵy aıqasty 12-shi raýndqa deıin jetkizýdi kózdemegenin aıtty .