Golovkınniń jańa bapkeri: Biz durys baǵytta kelemiz

NUR-SULTAN. QazAqparat - Gennadıı Golovkınniń jańa bapkeri Djonaton Benks GGG komandasynyń durys baǵytta kele jatqanyn málimdedi, dep habarlaıdy QazAqparat realcombatmedia.com saıtyna silteme jasap.

Nıý-Iorktegi «Madison Square Garden» arenasynda ótken Gennadıı Golovkın men kanadalyq Stıv Rolls arasyndaǵy jekpe-jekten soń GGG jańa bapkeri Djonaton Benks pikir bildirdi. Onyń aıtýynsha, Golovkın az ǵana ýaqyttyń ishinde ózin babynda ekenin kórsetti.

«Jekpe-jekti nokaýtpen aıaqtaǵan jaqsy. Maǵan shákirtimniń rıngtegi is-qımyldary unady. Biz az ýaqyttyń ishinde jaqsy jetistikti kórsettik. Endi budan jaqsy kórsetkishterge qol jetkizýge ýaqyt jetedi. Biz durys baǵytta kele jatyrmyz», - dedi ol.

CompuBox statıstıkasyna súıensek, tórt raýndta Golovkın ózine baǵyttalǵan 223 soqqynyń 62-in ótkizip alǵan. Tıisinshe, Rollsqa 38 soqqy dál tıgen.

Eske salaıyq, 9 maýsym kúni Nıý-Iorkte Gennadıı Golovkın kanadalyq Stıv Rollsty nokaýtpen jeńdi.

Boks keshiniń anderkartynda taǵy eki qazaqstandyq óner kórsetti. Buǵan deıin jeńilip kórmegen Álı Ahmedov óz myqtylyǵyn kezekti ret dáleldedi. Ol tájirıbeli amerıkalyq Markýs MakDenıeldi tehnıkalyq nokaýtpen jeńip, WBC International tıtýlyn jeńip aldy.

Al 32 jastaǵy aqtóbelik boksshy Baqtııar Eıýbov (14-0-1, 12 KO) amerıkalyq Braıan Sebaloǵa (8-0, 4 KO) ese jiberip qoıdy.