Golovkınniń promoýteri: Úshinshi kezdesýden bas tartatyn sebep kórip turǵanym joq

NUR-SULTAN. QazAqparat – Qazaqstandyq boksshy Gennadıı Golovkınniń (41-1-1, 36 KO) promoýteri Tom Leffler Saýl Alvarestiń (56-1-2, 38 KO) Bıllı Djo Sonderspen (30-1, 14 KO) kezdesýine qatysty pikir bildirdi.

Sondaı-aq ol Alvarestiń esine trılogııany saldy, dep habarlaıdy Sports.kz.

«Kanelo» 70 myń telekórermen aldynda nokaýtpen jeńdi. Bul óte jaqsy jetistik. Alaıda GGG-men kezdesý Floıd Meıvezeren keıingi eń qıyn aıqas bolady. Golovkın birinshi kezdesýde jeńiske jetti, tipti ekeýinde de deýge bolady. Eger sende osyndaı myqty jekpe-jekter ótkizetin múmkindik bolsa, nege úshinshi kezdesýdi uıymdastyrmasqa. «Kanelo» óziniń myqtylyǵyn kórsetti. Quttyqtaımyn!», dep jazdy Tom Leffler óziniń Twitter-degi paraqshasynda.

Aıta keteıik, «Kanelo» Sondersti jeńip, álem chempıonnyń úsh tıtýlyn biriktirdi. Osyǵan deıin ol qazaqstandyq Gennadıı Golovkınmen (40-1-1, 36 KO) úshinshi kezdesýge daıyn ekenin, ol úshin qazaqstandyqtyń sýper orta salmaqqa kóshýi kerektigin aıtqan bolatyn.

Golovkın men «Kanelonyń» birinshi kezdesýi teń aıaqtaldy jáne ol úlken daý týdyrdy. Odan keıingi kezdesýde tóreshiler basym daýyspen jeńisti Alvareske berdi.