Golovkınniń promoýteri Sonderstiń ókilderimen júrgizilip jatqan kelissózder týraly aıtyp berdi

ASTANA. QazAqparat - K2 Promotions atqarýshy dırektory Tom Leffler jazǵa josparlanǵan Gennadıı Golovkın men Bıllı Djo Sonders arasyndaǵy jekpe-jek boıynsha júrgizilip jatqan kelissózder týraly aıtyp berdi, dep habarlaıdy Sports.kz.

«Biz Frenk Ýorrenmen (Sonderstiń promoýteri) árdaıym baılanysyp otyrdyq, aıqasty jaqsy ótkizýdiń túrli joldaryn qarastyryp jatyrmyz. Bul týraly kelesi aptada tolyǵyraq biletin bolamyz. Sonderstiń komandasy tarapynan qoıylǵan dedlaın jóninde nemese Oskar De La Hoııanyń maýsym aıyndaǵy jekpe-jekke qarsy ekendigi týraly aqparatty ázirge bilmeımin. Gennadııdiń maqsaty barlyq tıtýldardy biriktirý boldy. Biz Frenk Ýorrenmen aıqasty ótkizýdiń múmkindikterin aıqyndaý týraly, eger múmkindik bolsa - ony ótkizý jaıly kelissózder júrgizdik. Bul Qazaqstan úshin EKSPO kórmesinde bolatyn eń úlken oqıǵa. Merzimine baılanysty anyqtalmaǵan jaıttar bar. Biz Ulybrıtanııa úshin de, Qazaqstan úshin de neniń tıimdi ekenin qarastyramyz», - dep jaýap berdi Leffler Boxingscene.com portalyna bergen suhbatynda.