Golovkınniń promoýteri «Kanelomen» úshinshi jekpe-jektiń kelissózderi týraly aıtty

ASTANA. QazAqparat - Qazaqstandyq boksshy Gennadıı Golovkınniń (38-1-1, 34 KO) promoýteri Tom Leffler onyń meksıkalyq Saýl Alvarespen (50-1-2, 34 KO) ótkizýi múmkin úshinshi jekpe-jegi týraly pikir bildirdi, dep habarlaıdy Sports.kz.

«Biz Golovkınge óz tıtýldary úshin kúresý múmkindigin berýdi suraımyz, bizdińshe, bul durys. Shyn máninde, bul eki boksshy úshin de eń úlken jekpe-jek. Men Erık Gomespen birneshe ret sóılestim. Olar da buǵan múddeli dep oılaımyn, óıtkeni bul tek Golovkın úshin ǵana emes, «Kanelo» úshin de eń kóp gonorar alýǵa múmkindik. Olar tek úzdik boksshy ǵana emes, sonymen qatar bıletteri eń kóp satylatyndar da osylar. Sondyqtan olar («Kanelonyń» komandasy - Red.) úshinshi jekpe-jekke qarsy emes. Barlyǵy da ýaqyttyń enshisinde. Eki boksshy da demalysta júrgende kóp sharýany tyndyrýǵa bolady. Bul aıqastyń máni bar, ony fanattar kórgisi keledi», - dedi Leffler.