Golovkınniń promoýteri Alvarespen bolýy yqtımal úshinshi kezdesý týraly aıtty

ASTANA. QazAqparat - Qazaqstandyq boksshynyń promoýteri Tom Leffler Fight Hub arnasyna bergen suhbatynda orta salmaq dárejesindegi Gennadıı Golovkın (38-0-1, 34 KO) men Saýl Alvares (49-1-2, 34 KO) arasyndaǵy úshinshi jekpe-jektiń ótýi múmkin ýaqytty aıtty, dep habarlaıdy QazAqparat «SPORTINFORM» SAA-ǵa silteme jasap.

«Biz Gennadııge eń yńǵaıly kezeńdi tańdaý úshin barlyq nusqalardy qarastyramyz. Golovkın ekinshi jekpe-jekte de áldeqaıda myqty boldy degen oıdamyz. Meniń raýndtar boıynsha esebim 8:4 boldy. Alaıda osy joly Alvareske min taǵýdyń mańyzy joq. Olardyń jekpe-jekke jospary myqty bolǵan. Degenmen, Golovkınniń soqqylary dálirek boldy dep oılaımyn. Alvares tóreshilerdi sendirgenimen, biraz kúsh salýyna týra keldi. Mysaly, men Alvarestiń 12-shi kezeńdi jeńgenimen kelispeımin.

Golovkın bokstasýyn jalǵastyrady. Jeltoqsanda, kóktemde, tipti mamyrda judyryqtasýǵa daıyn. Eger Alvarespen úshinshi kezdesý ótkizýge kelisetin bolsaq, mamyrda bolýy yqtımal. Gennadıımen, Oskarmen (De La Hoııa) jáne Erıkpen (Gomes) otyryp, úshinshi kezdesýdi qaı ýaqytta ótkizý tıimdi ekenin aqyldasamyz. Nemese basqa baǵytta ketýge sheshim qabyldaımyz.

«Degenmen Alvaresti moıyndaýǵa týra keledi. Ol shegingisi kelmeı, alǵa jyljydy. Basqasyn bilmeımin, biraq meni tańǵaldyrdy. Men ony qorǵaný stılinde judyryqtasady dep oılaǵanmyn. Alaıda bul stıl Golovkınge kóbirek unaıdy. Degenmen, Golovkın esh uıalmaıdy. Keremet judyryqtasty. Sheshimge qarsy keletin oıymyz joq, úkimdi qurmetteımiz. Alaıda Golovkın biz úshin chempıon bolyp qala bermek. Ózderińiz baıqaǵandaı, ekinshi kezdesý alǵashqydan áldeqaıda joǵary deńgeıde ótti. Úshinshi aıqasty tamashalaımyz degen oıdamyn», - dedi T. Leffler.